დრე (სოფელი გორის მუნიციპალიტეტში)
დრე - სოფელი აღმოსავლეთ საქართველოში, შიდა ქართლში, გორის მუნიციპალიტეტში, გორიდან 21 კმ.-ზე, წერეთის ქედის ჩრდილოეთ კალთაზე.
დრე პირველად მოიხსენიება ვახუშტი ბატონიშვილის (XVIII ს.) ტანის ხეობის სოფელთა სიაში. იგი გარკვეულ როლს ასრულებდა ქართველი ხალხის მიერ გარეშე მტრის წინააღმდეგ წარმოებულ ბრძოლებში, იცავდა ატენს მტრის შემოსევებისაგან.
XIX საუკუნის 40-იან წლებში დრეში მოქმედებდა ანდრეევსკის ტყავის ქარხანა.
1940 წელს არსებობდა დრეს სასოფლო საბჭო რომელშიც 244 კომლი ირიცხებოდა და ნაწილდებოდა შემდეგ სოფლებზე: სიქალეთი - 36 კომლი; ლევიტანა - 22 კომლი; ველები - 18 კომლი; ურიული - 20 კომლი; დრე - 58 კომლი; სანდისი - 22 კომლი; დიდი წერეთი - 34 კომლი; იკნევი - 34 კომლი.
1990-იანი წლების დასაწყისამდე სოფელ დრეში ძირითადად ოსური მოსახლეობა ცხოვრობდა. ქართულ-ოსური კონფლიქტის დროს ადგილობრივებმა სოფელი დატოვეს. 2002 და 2014 წლების აღწერის მიხედვით, იქ არავინ ცხოვრობს. არსებული ინფორმაციით, დრეში მიტოვებულ სახლ-კარს ზაფხულობით მხოლოდ ერთი ოჯახი აკითხავს.
2019 წელს გორის მუნიციპალიტეტში, ტანას ხეობაში მდებარე ნასოფლარს დასახლების სტატუსი მიენიჭა ამის შესახებ გადაწყვეტილება გორის მუნიციპალიტეტის საკრებულომ 11 იანვრის სხდომაზე მიიღო.
