იფიკლესი
იფიკლესი – (ბერძნ.) ამფიტრიონისი და ალკმენეს ძე, ჰერაკლეს ტყუპისცალი, იოლაოსის მამა.
როდესაც ზევსმა ამფიტრიონის მეუღლის, ალკმენეს სარეცელი გაიზიარა, იშვა ორი ვაჟი: უკვდავის მოდგმა ჰერაკლე და მოკვდავი იფიკლესი. ეჭვიანმა ჰერამ ახალშობილებს ორი უზარმაზარი გველი მიუგზავნა. იფიკლესი შეშინდა, ხოლო ჰერაკლემ ეს ურჩხულები თავისი პატარა ხელებით მოგუდა. იფიკლესი თან ახლდა ხოლმე თავის გმირ ძმას დიად საქმეთა აღსრულებისა თუ ლაშქრობათა ჟამს. იგი ეხმარებოდა ჰერაკლეს ავგიასის თავლების გაწმენდისას, ლაომედონის წინააღმდეგ ბრძოლისას და მაშინაც, როდესაც ჰიპოკოონს ეომებოდა. ერთ-ერთი მითოსის თანახმად, იფიკლესი სწორედ ამ ჰიპოკოონის ვაჟიშვილების წინააღმდეგ ბრძოლის ჟამს დაიღუპა (სხვა ვერსიით, მოლიონიდებთან ბრძოლისას). იგი დაკრძალეს არკადიაში, სადაც დასტურდება მისი კულტის არსებობა.
