საკურთხისის მაცხოვრის ეკლესია
საკურთხისის მაცხოვრის ეკლესია - არქიტექტურული ძეგლი მდებარეობს, საქართველოში, შიდა ქართლის მხარეში, კასპის მუნიციპალიტეტში, სოფელ წინარეხის სამხრეთით 7-8 კმ-ზე, ნასოფლარ საკურთხისის სასაფლაოზე, სტილისტური ნიშნებით თარიღდება IX-X საუკუნეებით.
აღწერილობა
ეკლესია დარბაზულია (8,5X X4,7 მ), ნაგებია სხვადასხვა ზომის ნატეხი ქვით. ძლიერ დაზიანებულია: ჩამონგრეულია კამარა და კონქი, დანგრეულია ჩრდილოეთ და დასავლეთ კედლების უმეტესი ნაწილი. დაზიანებულია აღმოსავლეთით მდგარი ეკლესიის მაღალი საყრდენი კედელიც შესასვლელი ორია – სამხრეთი კედლის დასავლეთ და ჩრდილოეთ კედლის აღმოსავლეთ მონაკვეთებში. სამხრეთის კარი შიგნიდან თაღოვანია, გარედან – სწორკუთხა, ჩრდილოეთისა – შიგნიდან და გარედან სწორკუთხა. ნახევარწრიული აფსიდის ღერძზე ერთი სარკმელია. თითო სარკმელია სამხრეთ და დასვლეთ კედლებშიც. სამხრეთ ფასადზე შემორჩენილია თაროსებრი ლავგარდნის მხოლოდ ერთი ქვა. ეკლესიას სამხრეთით მთელ სიგრძეზე ჰქონია გვიანდელი მინაშენი (დანგრეულია).
