ტექნოპარკი
ტექნოპარკი - (industrial park), მაღალტექნოლოგიური პარკი. სათავეს იღებს XX საუკუნის 50-იანი წლებიდან, როდესაც აშშ-ში, კალიფორნიის შტატში სტენფორდის უნივერსიტეტთან შეიქმნა სამეცნიერო პარკი და საფუძველი ჩაეყარა მაღალი ტექნოლოგიების სფეროში მეცნიერულ კვლევა-ძიებას. ამჟამად აშშ-ში 160-ზე მეტი ტექნოპარკია, რაც მსოფლიოში არსებული ტექნოპარკების 30%-ს შეადგენს.
ევროპაში ტექნოპარკები გამოჩნდა 70-იანი წლების დასაწყისში. ერთ-ერთი პირველთაგანებია ედინბურგში ჰერიოტუაიტის უნივერსიტეტის კვლევითი პარკი, ტრინიტის სამეცნიერო პარკი კემბრიჯში და ა.შ.
80-იანი წლებიდან ტექნოპარკები იქმნება კანადაში, სინგაპურში, ავსტრალიაში, ბრაზილიაში, იაპონიასა და ჩინეთში. აღსანიშნავია, რომ ამჟამად ჩინეთში, სადაც 50-ზე მეტი ტექნოპარკია, განსაკუთრებული ყურადღება ექცევა მათ განვითარებას. ეროვნულ ტექნოპარკებს მილიარდობით მოგება მოაქვთ ქვეყნისათვის. ტექნოპარკებს ზოგჯერ კლასტერებსაც უწოდებენ.
