უილიამ პეტი
პეტი უილიამ - (1623-1687) (Petty William), ინგლისელი ეკონომისტი და მრავალმხრივ განსწავლული მეცნიერი. კლასიკური პოლიტიკური ეკონომიის მამამთავარი.
პეტიმ ჯერ მედიცინა შეისწავლა ლეიდენის, პარიზისა და ოქსფორდის უნივერსიტეტებში, ხოლო 1649 წელს ოქსფორდის უნივერსიტეტში ფიზიკის დოქტორის ხარისხი მიიღო, 1651 წელს კი ანატომიისა და მუსიკის პროფესორი გახდა. პეტის სპეციალური ეკონომიკური განათლება არ ჰქონია. საბუნებისმეტყველო მეცნიერებაში შემუშავებული მეთოდოლოგია და პრინცი პები მას ეკონომიკის ღრმად შესწავლაშიც დაეხმარა. პეტის დიდი დამსახურებაა ის, რომ მან პირველმა მიაქცია ყურადღება სიმდიდრის ორ ფაქტორს - შრომასა და მიწას. იგი სიმდიდრის წყაროდ მიიჩნევდა არა მიმოქცევის, არამედ მთლიანად წარმოების სფეროს. პეტი აღნიშნავდა: „შრომა მამაა და უაქტიურესი წყარო სიმდიდრისა, ხოლო მიწა დედაა მისი“.
პეტიმ პირველმა დააყენა საკითხი დიფერენციული რენტისა და მიწის ფასის შესახებ. მან განსაზღვრა ღირებულება, როგორც დახარჯული შრომის შედეგი, დაადგინა რაოდენობრივი დამოკიდებულება ღირებულების სიდიდესა და შრომის მწარმოებლურობას შორის, მაგრამ ღირებულების სიდიდის გაზომვას ცდილობდა მხოლოდ ორი ფაქტორით: მიწითა და შრომით. იგი საზოგადოების ეკონომიკურ განვითარებას განიხილავდა ეკონომიკურ კანონებთან დამოკიდებულებაში, თუმცა, აიგივებდა საზოგადოებრივ, ეკონომიკურ და ბუნების კანონებს, განიხილავდა მათ როგორც მუდმივსა და შეუცვლელს. პეტის კალამს ეკუთვნის შემდეგი ნაშრომები: „ტრაქტატი გადასახადებისა და მოსაკრებლების შესახებ“ (1662), „ირლანდიის პოლიტიკური ანატომია“ (1672), „პოლიტიკური არითმეტიკა“ (1683), „ზოგი რამ ფულის შესახებ“ (1682), „სიტყვა ბრძენთათვის“ (1662) და ა.შ.
