ამამლო
ამამლო - სოფელი საქართველოში, დმანისის მუნიციპალიტეტში, კლიმატური საკურორტო ადგილი, მდინარე ამამლოწყლის მარცხენა ნაპირზე, ქ. დმანისიდან 8 კმ-ში, სამხრეთ-აღმოსავლეთით. მდინარე შავწყაროსწყლის (მდინარე ხრამის (ქციის) მარჯვენა შენაკადი) მარცხენა ნაპირზე, ზღვის დონიდან 1160-1180 მ-ის სიმაღლეზე. რელიეფი – მთაგორიანი.
დამტკიცებულია, როგორც საკურორტო ადგილი, საქართველოს პრეზიდენტის 2005 წლის 22 ივლისის № 655 ბრძანებულებით.
ჰავა − საშუალო მთის ქვედა სარტყლის, ზომიერად ნოტიო. იცის ზომიერად ცივი ზამთარი. იანვარის საშუალო ტემპერატურაა -2,7°C. ზაფხული ზომიერად თბილია. ივლისის საშუალო ტემპერატურაა 18,2°C. საშუალო წლიური ტემპერატურა შეადგენს 7,8°C. საშუალო წლიური ფარდობითი ტენიანობა შეადგენს 73%-ს, ხოლო ნალექების წლიური რაოდენობა _ 698 მმ-ს. ნალექების მაქსიმუმი მოდის მაისზე, ხოლო მინიმუმი − იანვარზე.
ამამლოში გავრცელებულია ფოთლოვანი ხეები (წიფელი, მუხა, ნეკერჩხალი და სხვ.). საკურორტო ადგილის მიდამოებში, ხეობების ძნელმისადგომ უბნებში, შემორჩენილია: ნეკერჩხლის, ცირცელის, ტირიფის, მუხის მცირე დაკნინებული დერივატები. ტყის გაჩეხვის გამო, ამჟამად გაჩეხვის ადგილებში, მთის ველის ბალახეულობაა.
ამამლოს ბუნებრივი სამკურნალო ფაქტორებია საშუალო მთის ქვედა სარტყლის ჰავა და აეროიონებით გაჯერებული მთის ჰაერი.
ამამლოს ბუნებრივი სამკურნალო ფაქტორების გამოყენების მეთოდია პასიური კლიმატოთერაპია.
ჩვენებები ამამლოში წასასვლელად: დასვენება: ნივთიერებათა ცვლის, ენდოკრინული და ცენტრალური ნერვული სისტემების ფუნქციური დარღვევები; გულ-სისხლძარღვთა სისტემისა და ფილტვების ქრონიკული, არასპეციფიკური დაავადებები.
ტურისტული ობიექტები:
ამამლოს სამხრეთით 1 კმ-ზე დგას XII საუკუნის ერთნავიანი, დარბაზული ეკლესია, რომლის დასავლეთ ფასადზე წვრილი მთავრულით ამოკვეთილ საამშენებლო წარწერაში მოხსენიებულია მეფე თამარი, ერისთავი კახა, მისი დედა კრავალ და ეკლესიის მაშენებელი ბეღელას ძე ოქროპირი (წარწერიანი ქვა დაცულია საქართველოს ეროვნულ მუზეუმში). ეკლესიასთან არსებულ სასაფლაოზე შემონახული იყო VIII-IX სს. დიდი ქვაჯვარი, რომლის კვარცხლბეკზე ამოკვეთილია XIII ს. წარწერა. ამჟამად ქვაჯვარი დაკარგულია და შემორჩენილია მხოლოდ მისი ფოტოსურათი.
ლიტერატურა
მუსხელიშვილი ლ., არქეოლოგიური ექსკურსიები მაშავრის ხეობაში, თბ., 1941.
