აპოპის წიგნი
აპოპის წიგნი – ეგვიპტოლოგიაში ეწოდება ცალკეული გამონათქვამების კრებულს რას მიერ აპოპის და წყვდიადის დამარცხების შესახებ. პაპირუსის ცალკეული გამონათქვამები დასათაურებულია, როგორც „წიგნი აპოპის დასამარცხებლად“. „წიგნი“ შემოგვინახა დღეს ბრიტანეთის მუზეუმში დაცულმა ბრემნერ-რინდის პაპირუსმა, რომელიც ჩვ.წ.-მდე IV საუკუნეშია ჩაწერილი, თუმცა წიგნის შინაარსი გაცილებით უფრო ძველი, სარკოფაგების ტექსტების და მკვდართა წიგნის (თავი 15) იმ გამონათქვამების განვითარებას წარმოადგენს, სადაც მზის მიერ მიწისქვეშეთის გველის სახის დემონების დამარცხებაზეა მოთხრობილი. პაპირუსის გამონათქვამები წარმოითქმებოდა კარნაკის ტაძარში ყოველდღიური რიტუალის დროს, რომელიც ბნელეთის ძალებზე რას გამარჯვებას ზეიმობდა. მსგავსი რიტუალი ბევრ ეგვიპტურ ტაძარში ტარდებოდა. ედფუს ტაძრის ბიბლიოთეკის კედელზე გამოსახულია ბრძენი იმხოტეპი, რომელიც ხორს წიგნს უკითხავს. წიგნის ქვეშ მოთავსებულია წარწერა: „რას დიდება, აპოპის დამარცხება“.
