თინუსი

თინუსი – Thunnus thynus Linne 1758

ტიპი: ქორდიანები
კლასი: სხივფარფლიანი თევზები
რიგი: სკუნბრიასნაირნი
ოჯახი: თინუსისებრნი
გვარი: თინუსები
სახეობა: თინუსი

თევზის სახეობა თინუსების გვარისა. მალები 39-41, ლაყუჩთა ჩხირები 37. თინუსს მძლავრად განვითარებული კანის სისხლძარღეოვანი სისტემა აქვს, რომელიც გვერდის კუნთების სისხლძარღვოვან ქსელს უკავშირდება ღვიძლის შინაგან ზედაპირთან, ან ჰემალის არხთან. სისხლის მიმოქცევის ასეთი სისტემის განვითარების გამო თევზის სხეულის ტემპერატურა წყლის ტემპერატურაზე მაღალია. სხეული მთლიანად ქერცლითაა დაფარული, რომელიც მკერდის ფარფლების არეში არამკაფიოდ გამოსახულ ჯავშანს ჰქმნის. მკერდის ფარფლები მოკლეა და ზურგის მეორე ფარფლის საწყისს ვერ სწვდებიან. ზურგისა და ანალური ფარფლების უკან ათ-ათი დამატებითი პატარა ფარფლია.

გავრცელებულია ევროპაში – ხმელთაშუა და შავ ზღვებში. ატლანტის ოკეანის აღმოსავლეთ ნაწილიდან მაროკოს, ისლანდიისა და ნორვეგიის სანაპიროებამდე; ჩრდილოეთის ზღვაში, ბალტიის, ჩრდილოეთ ამერიკის ატლანტის სანაპიროებში, წყნარ ოკეანეში.

ყოფილი საბჭოთა კავშირის ფარგლებში გავრცელებულია შავ და იაპონიის ზღვებში. შედის აზოვის ზღვაში, იშვიათად ბარენცის ზღვშიც.

წყარო

საქართველოს თევზების სარკვევი