იეზუიტთა თეატრი

იეზუიტთა (იესოისტთა) თეატრი – თეატრალური წარმოდგენები იეზუიტთა ორდენის სასულიერო სასწავლებლებში. აღმოცენდა გერმანიასა და ავსტრიაში. იარსება 1555-დან 1773 წლამდე როგორც სასკოლო თეატრის ერთ-ერთმა განშტოებამ. ეწეოდა კათოლიკური იდეებისა და დოგმების პროპაგანდას. ორი საუკუნის მანძილზე განიცადა საგრძნობი, მაგრამ არა არსებითი ცვლილებები. წარმოდგენები იდგმებოდა ლათინურ ენაზე, რაც ხელს უწყობდა მოსწავლეებს, უკეთ დაუფლებოდნენ ლათინურს. 1599 წელს გამოცემული კანონის თანახმად, პიესის ავტორები და დამდგმელები შერჩეული უნდა ყოფილიყო პედაგოგ-იეზუიტთა რიგებიდან სკოლის აღსაზრდელებს, რომლებიც ემზადებოდნენ სასულიერო და სახელმწიფო მოღვაწეობისათვის, სცენურ ხელოვნებას ასწავლიდნენ მეტყველების და კეთილშობილური მანერების დასახვეწად.

მე-16 ს. იეზუიტთა თეატრი ახლოს იდგა მისტერიასა და ლიტურგიკულ დრამასთან, ბოლო პერიოდში – კლასიციზმთან.

იეზუიტთა თეატრს ჰქონდა მკაცრად კანონიზებული საკუთარი ესთეტიკა, რომლის ფუძემდებლები იყვნენ ი. პონტანი (1542-1626) და ფ. ლანგი (1654-1725).

წყარო

მსოფლიო თეატრის ენციკლოპედიური ლექსიკონი