კავშირგაბმულობის კვანძი
კავშირგაბმულობის კვანძი - კავშირგაბმულობის ძალების და საშუალებების, ჯარების ავტომატიზებული მართვის საშუალებების საორგანიზაციო-ტექნიკური გაერთიანება, რომელიც გაშლილია მართვის პუნქტზე. იგი იშლება ჯარების (ძალების) მართვის პროცესში ინფორმაციის გაცვლის მიზნით. არის კავშირგაბმულობის სისტემის ერთ-ერთი ძირითადი ელემენტი. იგი უზრუნველყოფს არხების შექმნას და ინფორმაციის გასაიდუმლოებას.
საბრძოლო გამოყენების, განთავსების და აღჭურვილობის მიხედვით კავშირგაბმულობის კვანძი შეიძლება იყოს სტაციონარული ან მოძრავი, დანიშნულების მიხედვით კი - მართვის პუნქტის, დამხმარე და საყრდენი.
მის შემადგენლობაში შეიძლება შედიოდეს: საკომანდო-საშტაბო მანქანების ჯგუფი, რადიოცენტრი ან საშუალო სიმძლავრის რადიოსადგურების ჯგუფი, სატელეგრაფო კავშირგაბმულობის ცენტრი (სადგური), სატელეფონო კავშირგაბმულობის ცენტრი (სადგური), არხწარმოქმნის ცენტრი (სადგური), ავტომატური საკომუნიკაციო ცენტრი, ჯარების მართვის ავტომატიზებული საშუალებების ცენტრი, ელექტროკვების ცენტრი (სადგური), კავშირგაბმულობის კვანძის მართვის პუნქტი, ფელდეგერული საფოსტო სადგური, ვერტმფრენებისთვის დასაჯდომი მოედანი, ტექნიკური მომსახურების ჯგუფი.
სარჩევი |
განსაკუთრებული დანიშნულების კავშირგაბმულობის კვანძი
კავშირგაბმულობის სტრატეგიული და ოპერატიულ-სტრატეგიული ელემენტი, განკუთვნილია სტაციონარული და საველე ქსელების დაწყვილებისთვის.
დამხმარე კავშირგაბმულობის კვანძი
კავშირგაბმულობის სისტემის ელემენტია. მისი დანიშნულებაა ზემდგომი შტაბის მართვის პუნქტიდან მნიშვნელოვან მანძილზე მოქმედ ჯარებთან (ძალებთან) კავშირგაბმულობის უზრუნველყოფა.
მართვის პუნქტის კავშირგაბმულობის კვანძი
როგორც გაერთიანების (შენაერთის) კავშირგაბმულობის სისტემის ელემენტი, განკუთვნილია ზემდგომ და ქვემდგომ ურთიერთმოქმედ შტაბებთან კავშირგაბმულობის უზრუნველყოფისთვის, აგრეთვე მართვის პუნქტის შიდა კავშირისთვის.
მოძრავი კავშირგაბმულობის კვანძი
მოძრავი მართვის პუნქტის ელემენტი, უზრუნველყოფს კავშირს ოპერაციებში, ხოლო მშვიდობიანობის დროს - სწავლებებსა და მანევრებზე.
საყრდენი კავშირგაბმულობის კვანძი
არის კავშირგაბმულობის საყრდენი ქსელის ელემენტი. ეწყობა კავშირგაბმულობის ღერძების გადაკვეთაზე.
სტაციონარული კავშირგაბმულობის კვანძი
სტაციონარული მართვის პუნქტის ელემენტი, განკუთვნილია კავშირის უზრუნველსაყოფად ჯარების ყოველდღიური საქმიანობის პირობებში. არის სტაციონარული ქსელის საფუძველი და შედის ტერიტორიული კავშირგაბმულობის ქსელის შემადგენლობაში.
