კონსალტინგი
კონსალტინგი - (consulting) [<ინგლ. consulting - საკონსულტაციო] - სამმართველო კონსულტირება, განხორციელებული სპეციალიზებული კომერციული ფირმების მიერ წარმოების მართვის ორგანიზაციისა და სრულყოფის სფეროში ახალშექმნილი საწარმოების საქმიანობის დაფუძნების, მარკეტინგული კვლევის მიზნით. საკონსალტინგო ფირმები მსხვილი კომპანიების დაკვეთით აანალიზებენ ამ კომპანიების წარმოების ორგანიზაციისა და მართვის შესაბამისობას, მათი საქმიანობის შედეგებს, შეიმუშავებენ რეკომენდაციებს მათი რენტაბელობის ამაღლებისათვის, კონკურენტუნარიანობისუზრუნველყოფისათვის, ადგენენ მათი განვითარების გრძელვადიან კონცეფციას და ბიზნეს-გეგმას, ამზადებენ ტექნიკურ-ეკონომიკურ დასაბუთებას შვილობილი კომპანიების შესაქმნელად და ა.შ. კონსულტანტები ჩვეულებრივ ისეთი სპეციალისტები არიან, რომლებსაც, თეორიულ ცოდნასთან ერთად, აქვთ დიდი პრაქტიკული გამოცდილება მენეჯმენტის, მარკეტინგის და ა.შ. სფეროში. საკონსალტინგო ფირმებთან ერთად, სამმართველო კონსულტირების სფეროში მომსახურებას ეწევიან სხვადასხვა სამეცნიერო-კვლევითი ორგანიზაციები, რომლებსაც ამ მიზნით ჩამოყალიბებული აქვთ სპეციალური განყოფილებები და სამსახურები. საკონსალტინგო ფირმები მომსახურებას ეწევიან ფასწარმოქმნის სფეროში. ფასების პროექტის შედგენით ისინი მონაწილეობენ რესურსების მიმწოდებლებსა და პროდუქციის დამამზადებლებს შორის, აგრეთვე მათ შემკვეთებთან ხელშეკრულების დადებაში. საკონსალტინგო ფირმების მომსახურება მნიშვნელოვნად ამცირებს მაღალკვალიფიციური საკონსულტაციო დახმარების მიღებასთან დაკავშირებულ ხარჯებს. კონსალტინგი, ინჟინერინგთან და აუდიტთან ერთად, საბაზრო ინფრასტრუქტურის აუცილებელი ელემენტია.
