მესხენტი
მესხენტი – (ეგვ. Mshn.t), მშობიარობის ადგილი, აგურები, რომლებზეც მშობიარე იდგა, ასევე მშობიარობის ქალღმერთი. ეგვიპტელთა წარმოდგენით აგურებს, რომლებზეც ჩაცუცქული მშობიარე იდგა, მისი დაცვა შეეძლო, თოტი კი მათზე ახალშობილის სიცოცხლის წლებს წერდა. ამიტომ მათ შელოცვებს ეუბნებოდნენ და მსხვერპლს წირავდნენ. მათ ამულეტების სახითაც ამზადებდნენ. თანდათან მოხდა მათი ქალღმერთად პერსონიფიცირება. ითვლებოდა, რომ მესხენტი ბავშვს უკვე დედის მუცელში კას ჩაუსახავდა, დაბადებისას კი მის ბედს განსაზღვრავდა. აბიდოსში მესხენტი ოთხ ქალღმერთად გადაიქცა, რომელთა მბრძანებელი ისიდა იყო. ამ ოთხ მესხენტს თვისი ეპითეტები ჰქონდა, „დიდი“, „მშვენიერი“, „ლამაზი“ და „ის, ვისაც ახსოვს“. გვიანდელ დროში ისინი შეერწყა ტეფნუტს, ნუტს, ისიდას და ნეფტიდას. ასევე ითვლებოდნენ პირველი, მეორე, მეოთხე და მეხუთე ეპაგომენალური დღეების მფარველებად. როგორც ყველა პერსონიფიკაციას, მესხენტს ანთროპომორფული სახე ჰქონდა.
