მონუმენტი
მონუმენტი – არქიტექტურული ან სკულპტურული ნაგებობა გამოჩენილი ისტორიული პიროვნების ან მნიშვნელოვანი მოვლენის უკვდავსაყოფად. ძეგლი.
ტერმინი ხშირად გამოიყენება შენობა-ნაგებობების მისამართით, რომლებიც ითვლება არქიტექტურული ან კულტურული მემკვიდრეობის მნიშვნელოვან ძეგლად. მონუმენტი იქმნებოდა მრავალი ათასი წელი და წარმოადგენდა ძველი ცივილიზაციების სიმბოლოს. ისტორიამდელი ყორღანები, დოლმენები და მსგავსი სტრუქტურები შექმნილი იყო მთელ მსოფლიოში და სწორედ მათ შემოგვინახეს უძველესი კულტურისა და ცივილიზაციების ისტორია. ეს მონუმენტები ფიზიკურად ისეთი გრანდიოზულები იყო, რომ თითქმის შეუძლებელი გახდა მათი დანგრევა. მან კი კაცობრიობას დაუტოვა ისეთი ნაგებობები, როგორებიც იყო ეგვიპტის პირამიდები, ბერძნული პართენონი, ჩინეთის დიდი კედელი, ინდური ტაჯმაჰალი, იორდანიის პეტრა, ქალაქი მაჩუ-პიქჩუ, მოაიები კუნძულ პასხიზე და სხვ. უფრო მოგვიანებით მონუმენტური სტრუქტურები ბევრი ნაციონალური სახელმწიფოს სავიზიტო ბარათი გახდა, მაგ., თავისუფლების ქანდაკება აშშ-ისათვის, ეიფელის კოშკი – საფრანგეთისათვის, პარლამენტის შენობა – ბუდაპეშტისათვის (უნგრეთის რესპუბლიკა), კოლიზეუმი – იტალიის რესპუბლიკისათვის, ბორობუდური – ინდონეზიის რესპუბლიკისათვის და ა.შ. მონუმენტური არქიტექტურა თანამედროვე ეპოქაშიც ხშირად გამოიყენება ქალაქისათვის გაუმჯობესებული გარეგნული სახის მისაცემად და მათ ისეთივე დიდი დატვირთვა აქვთ, როგორც ანტიკურ პერიოდში.
წყარო
ხელოვნების განმარტებითი ლექსიკონი
სამშენებლო ენციკლოპედიური ლექსიკონი
