ნეფერირკარა (კაკაი)
ნეფერირკარა (კაკაი) – (ეგვ. Nfr-ir-k3-R, „რაც ჩაიდინა რას კამ, მშვენიერია“, დაახლ. 2446-2426 წწ.),ეგვიპტის V დინასტიის მესამე ფარაონი, სავარაუდოდ, სახურას ძმა. იმეფა დაახლოებით ოც წელიწადს. ცნობები მისი მეფობის შესახებ ძალიან მწირია. პირამიდა ააგო აბუსირში, სახურას პირამიდის სიახლოვეს. პალერმოს ქვიდან ცნობილია, რომ მან ასევე ააგო მზის ტაძარი, რომელიც ნაპოვნი არ არის. სავარაუდოდ, პალერმოს ქვის ანალების შედგენა და ქვაზე ამოკვეთა მისი მეფობის დროს მოხდა.
ნეფერირკარას პირამიდის მოსახსენიებელ ტაძარში აღმოჩენილია უმნიშვნელოვანესი ადმინისტრაციული შინაარსის პაპირუსები, რომლებშიც დეტალურად არის აღწერილი პირამიდის ყოველდღიური მომსახურება, მიწოდებული პროდუქტების რაოდენობა, ქურუმების სია, რომლებიც ასრულებდნენ მოვალეობას, სატაძრო ინვენტარის აღწერა და ა.შ., და ასევე წერილები.
თვითონ პირამიდის კომპლექსი დაუსრულებელია, და მასთან მისასვლელი გზა და ქვედა მოსახსენიებელი ტაძარი შემდეგში თავისი კომპლექსისათვის გამოიყენა ნიუსერრამ. ნეფერირკარას მეფობის უმნიშვნელოვანეს მოვლენას წარმოადგენს ეგვიპტელი მოხელეების ავტობიოგრაფიების გამოჩენა, რომლებიც III დინასტიის დროს ჩნდება და ქრება IV დინასტიის დროს, ზეღვთაება-ფარაონის აღზევების კულმინაციურ პერიოდში. ეს მოვლენა უდავოდ მეტყველებს პიროვნული თვითშეგნების ზრდაზე რიგით ეგვიპტელებში.
