ოლდენბურგი ქლეის
ქლეის ოლდენბურგი – (Claes Oldenburg, 1929) უორჰოლისა და ლიხთენსთაინის მსგავსად, შვედური წარმოშობის არტისტი ქლეის ოლდენბურგი (Claes Oldenburg, დ. 1929) სკულპტურულ ფორმებში ქმნის სამომხმარებლო კულტურის ირონიულ კრიტიკას. ის იუმორით წარმოგვიდგენს დიდი ზომის საჯარო პროექტს პომადა (აღმართული) მუხლუხოზე რომელიც მისი მშობლიური იელის უნივერსიტეტისთვის იყო დამზადებული. "მეორე ამერიკული რევოლუციისადმი" მიძღვნილი მონუმენტის შესაქმნელად, ის იელის არქიტექტურის სკოლის კურსდამთავრებულთა ჯგუფმა მიიწვია 1960-იანი წლების ბოლოს, მაშინ, როდესაც ვიეტნამის ომის წინააღმდეგ მიმართული სტუდენტური დემონსტრაციები იმართებოდა. ოლდენბურგმა გიგანტური ზომის ტუჩის საცხი ტრაქტორიდან მოხსნილ, ფოლადის მუხლუხოზე აღმართა. ვიზუალურად ქანდაკება გვთავაზობს როგორც მოძრავი სარაკეტო დანადგარის საომარ აგრესიას, ისე საცხის ფორმით გამოხატულ, ფალოსურ ეროტიკას. შესაძლოა, ავტორმა ასე გაათამაშა იმ დროის პოპულარული სლოგანი - „დაკავდი სიყვარულით და არა ომით“. პომადის ტანზე უნდა დამონტაჟებულიყო ორაზროვანი, ბუშტისმაგვარი ვინილის თავი, რომელიც ჰაერით გაიბერებოდა და შემდეგ, ნელ-ნელა დაიჩუტებოდა. მაგრამ დამტუმბავი არ დამონტაჟდა, ჩამოშვებული თავი კი იოლად ზიანდებოდა და ამიტომაც სწრაფად ჩანაცვლდა მეტალით. პომადის მონუმენტი პროვოკაციულად აღიმართა კამპუსის მოედანზე, ომის მემორიალისა და პრეზიდენტის ოფისის წინ. არ იყო გასაკვირი, რომ იელმა ოლდენბურგს მონუმენტის აღება მოსთხოვა. 1974 წელს, მან ხელახლა შექმნა ქანდაკება, მაგრამ ახლა უკვე უფრო მდგრადი ფოლადის, ალუმინისა და მინაბოჭკოვანი მასალებისგან და ის საჩუქრად გადასცა იელის უნივერსიტეტს. მონუმენტი მორსის კოლეჯის ეზოში განათავსეს.
