პერლიტბეტონი
პერლიტბეტონი – მსუბუქი ბეტონის სახეობა, რომელშიც შემავსებლად გამოიყენება აფუებული პერლიტი, ხოლო შემკვრელად – ცემენტი, კირი, სამშენებლო თაბაშირი, სინთეზური ფისი და სხვ. არსებობს ორი სახის: თბოსაიზოლაციო (სიმკვრივით 250-550 კგ/მ3) და კონსტრუქციულ-თბოსაიზოლაციო (სიმკვრივით 600-900 კგ/მ3), რომელიც ძირითადად გამოიყენება შენობის შემომზღუდავი კონსტრუქციების დასამზადებლად. პერლიტბეტონს აქვს ფოროვან-მარცვლოვანი სტრუქტურა, დაბალი მოცულობითი წონა და თბოგამტარობა. გამოირჩევა ბგერა-, ყინვა- და ბიომედეგობით, ცეცხლგამძლეობით. მისი გამოყენება შესაძლებელია ლითონის კონსტრუქციების ცეცხლმედეგობის ასამაღლებლად, სახანძრო და ავარიული გასასვლელების მოსაწყობად შენობაში. პერლიტბეტონს ამზადებენ მსუბუქ სამშენებლო ბლოკებს, რომლებიც წარმატებით გამოიყენება თვითმზიდი კედლების ასაშენებლად.
