პეჯენტი

პეჯენტი − (ინგ. pageant),

1. მოძრავი სცენა (შუა საუკუნეების თეატრში), რომელიც გამოიყენებოდა მისტერიის, მირაკლის, თეატრალიზებული პროცესიების, საზეიმო მსვლელობებისა და სხვა მისთანათა დროს. პეჯენტი წარმოადგენდა დიდ ოთხთვალას, რომელზედაც მოწყობილი იყო ორიარუსიანი ბალაგანი; ქვედა იარუსზე, რომელიც ყოველი მხრიდან დახურული იყო, თავს აფარებდნენ და ტანსაცმელს იცვლიდნენ მსახიობები, ხოლო ზედა იარუსზე, რომელსაც ჰქონდა ფარდა, მარტივი დეკორაცია და ბუტაფორია, სრულდებოდა სცენა ან მოქმედება მრავალმოქმედებიანი წარმოდგენიდან. შემდეგ პეჯენტი ამ სცენას იმეორებდა მომდევნო, წინასწარ დათქმულ ადგილას სადაც უკვე ელოდებოდა თავშეყრილი მაყურებელი, ხოლო მის პირვანდელ ადგილს, სიუჟეტის ზუსტი შესატყვისობის მიხედვით, სხვა პეჯენტი იწყებდა სანახაობის გამართვას.

2. XX საუკუნის დასაწყისიდან პეჯენტი დაერქვა ისეთ თეატრალურ წარმოდგენას, როდესაც გამოიყენება მოძრავი სასცენო მოედანი.

წყარო

ხელოვნების განმარტებითი ლექსიკონი