საჰაერო-სადესანტო ოპერაცია

NPLG Wiki Dictionaries გვერდიდან
გადასვლა: ნავიგაცია, ძიება

საჰაერო-სადესანტო ოპერაცია – საჰაერო-სადესანტო ჯარების ავიაციის და შეიარაღებული ძალების სხვა სახეობების მიზნის, ადგილის, დროის მიხედვით შეთანხმებული, ერთიანი ჩანაფიქრით და გეგმით მიმდინარე საბრძოლო მოქმედებები. საჰაერო-სადესანტო ოპერაცია მიმდინარეობს მოწინააღმდეგის ზურგში მრავალრიცხოვანი საჰაერო დესანტების გადასხმის და მათ მიერ დასახული საბრძოლო ამოცანების შესრულების მიზნით.

საჰაერო-სადესანტო ოპერაცია, ჩვეულებრივ, ეწყობა სტრატეგიული ან დაჯგუფების შეტევითი ოპერაციის ფარგლებში იმ საბრძოლო ამოცანების შესასრულებლად, რომლებსაც ვერ განახორციელებენ სხვა ძალები.

საჰაერო-სადესანტო ოპერაციის მიზნებია:

  • ხელი შეუწყოს ჯარებს შეტევის მაღალი ტემპით განვითარებაში, დიდი ბუნებრივი დაბრკოლებების შეუჩერებლივ ფორსირებაში, ძნელად გასავლელი რაიონების გადალახვაში, მოპირისპირე დაჯგუფებების ალყაში მოქცევასა და განადგურებაში;
  • ხელში ჩაიგდოს მოწინააღმდეგის უმნიშვნელოვანესი ობიექტები, მოშალოს მისი ჯარების მართვა და ლოგისტიკა;
  • საზღვაო დესანტებთან ურთიერთქმედებით ან დამოუკიდებლად დაეუფლოს კუნძულებს, სრუტის ზონებს და სხვა.

პირველად საჰაერო-სადესანტო ოპერაცია განხორციელდა II მსოფლიო ომში. გერმანელ ფაშისტთა ჯარები საჰაერო-სადესანტო ოპერაციებს აწყობდნენ ჰოლანდიაში, ბელგიასა და ნორვეგიაში (1940), ასევე კრეტას კუნძულის ხელში ჩასაგდებად. ინგლის-ამერიკის ჯარებმა საჰაერო-სადესანტო ოპერაცია განახორციელეს სიცილიის კუნძულის გასათავისუფლებლად (იტალიასა და საფრანგეთის სამხრეთში დესანტის გადასხმის დროს), ჩრდილოეთ საფრანგეთში შეჭრის და ჰოლანდიის ოპერაციის მსვლელობის დროს, რურის შეტევით ოპერაციაში.


წყარო

ქართული სამხედრო ენციკლოპედიური ლექსიკონი

მოძიებულია „https://www.nplg.gov.ge/wikidict/index.php?title=%E1%83%A1%E1%83%90%E1%83%B0%E1%83%90%E1%83%94%E1%83%A0%E1%83%9D-%E1%83%A1%E1%83%90%E1%83%93%E1%83%94%E1%83%A1%E1%83%90%E1%83%9C%E1%83%A2%E1%83%9D_%E1%83%9D%E1%83%9E%E1%83%94%E1%83%A0%E1%83%90%E1%83%AA%E1%83%98%E1%83%90&oldid=55215“-დან
პირადი ხელსაწყოები
სახელთა სივრცე

ვარიანტები
მოქმედებები
ნავიგაცია
ხელსაწყოები