სილიკატური მინა
სილიკატური მინა – მინა, რომელიც მიიღება კვარცის ქვიშის, ცარცის, სოდისა და სხვა კომპონენტებისაგან. გამჭვირვალობა და ნებისმიერ ფერად შეღებვის უნარი, მაღალი ქიმიური მედეგობა, დიდი სიმტკიცე და სიმაგრე, ელექტროიზოლაციური და სხვა დადებითი თვისება, სილიკატურ მინას ხდის შეუცვლელ მასალად. იყენებენ არა მარტო შუქგამტარ კონსტრუქციებში (ფანჯარა, ვიტრაჟი, მაშუქი), არამედ როგორც მოსაპირკეთებელ და კონსტრუქციულ მასალას. თანამედროვე მშენებლობაში მაღლივ შენობებს ხშირად აქვს გაუმჯობესებული დეკორატიული, სინათლეამრეკლი და თბოდამცავი მინისაგან დამზადებული ფასადები. გარდა ამისა, მინისაგან მზადდება სხვადასხვა ნაკეთობა (ბლოკი, მილი, პროფილი), ეფექტური თბოსაიზოლაციო მასალები (ქაფმინა, მინის ბამბა), მინაბოჭკო და მინაქსოვილი. სიმკვრივე დამოკიდებულია ქიმიურ შედგენილობაზე და ჩვეულებრივი სამშენებლო მინისათვის შეადგენს 2400-2600 კგ/მ3-ს. ფორიანობა და წყალშთანთქმა პრაქტიკულად ნულის ტოლი აქვს. სიმაგრე მოოსის სკალით შეადგენს 5-7-ს. ქიმიური მედეგობა სილიკატური მინის ერთ-ერთი უნიკალური თვისებაა. ის კარგად უძლებს წყლის, ტუტეებისა და მჟავების (გარდა მდნობი და ფოსფორის) ზემოქმედებას.
