ფო დარიო
დარიო ფო − (იტალ. Dario Fo, 1926− 2016), იტალიელი დრამატურგი, რეჟისორი, სცენური ოსტატობის თეორეტიკოსი, მხატვარი. ნობელის პრემიის ლაურეატი ლიტერატურის დარგში (1997), საპატიო დოქტორი რომის უნივერსიტეტისა „ლა საპიენცა“ (2006). 1963 წლიდან მოღვაწეობს როგორც მსახიობი, რეჟისორი, კაბარეების და ქუჩის თეატრების სკეტჩების ავტორი, 1969 წლიდან ხელმძღვანელობდა მოძრავ თეატრალურ დასს „ლა კომუნა“. იგი არის ავტორი ფარს-არლეკინადების, შავი იუმორით აღსავსე დოკუმენტური პოლიტიკური დრამების, გროტესკულ-სატირული პიესებისა: „მისტერია-ბუფი“, „ანარქისტის სიკვდილი უბედური შემთხვევისაგან“, „კაკ-კუკ! ვინ არის? პოლიცია“, „არ შეგიძლია გადაიხადო - ნუ გადაიხდი“. მის შემოქმედებაში ფართოდ არის გამოყენებული შუასაუკუნეების სამოედნო თეატრის, კომედია დელ’არტეს, ბაზრობების თოჯინური თეატრის, საცირკო კლოუნადის ხერხები.
