ცხვირის ობსტრუქცია

ცხვირის ობსტრუქცია

ახალშობილში

ახალშობილში, ცხვირის ობსტრუქცია, ქოანალური ატრეზიის ან სტენოზის გამო, შესაძლოა საბედისწერო გახდეს. ის იწვევს ახალშობილის სუნთქვის მწვავე ობსტრუქციას და ითხოვს რეანიმაციულ ღონისძიებებს.

როდესაც საქმე გვაქვს ორმხრივ ატრეზიასთან, ოპერაცია გარდაუვალია. გვაქვს ორი არჩევანი:

— ჩატარდეს მყისიერი ოპერაცია: (ქოანალური პლასტიკა, ტრაქეოსტომია). ოპერაციამდე მოხდეს პაციენტის სუნთქვით უზრუნველყოფა.

— მოხდეს პაციენტის კვება ოროგასტრალური ზონდით და უფრო მშვიდ ვითარებაში დაიგეგმოს ოპერაცია;

ქოანალური ატრეზიის დიაგნოზზე მიუთითებს პაციენტის სტრიდორული სუნთქვა, რომელიც უმჯობესდება პირის გაღების შემდეგ.

ზუსტი დიაგნოზის დასმა მხოლოდ კომპიუტერული ტომოგრაფიის შედეგად არის შესაძლებელი. მხოლოდ ეს კვლევა იძლევა ამომწურავ პასუხს რა ტიპის ატრეზიასთან გვაქვს საქმე (ცალმხრივი, ორმხრივი, ძვლოვანი თუ აპკოვანი).

ცალმხრივი ატრეზია უფრო მარტივია და შესაძლოა საერთოდ შეუმჩნეველი დარჩეს. მხოლოდ მოზრდილ ასაკში, ცალმხრივი რინორეა და ობსტრუქცია, შეიძლება გახდეს პაციენტის ექიმთან მისვლის მიზეზი.

არ უნდა გამოგვრჩეს ახალშობილის და ჩვილი ბავშვების ცხვირ-ხახის სიმსივნეები:

კისტოზური, ემბრიონალური სიმსივნეები, გლიომები (ნერვული გენეზის სიმსივნეები) და ენცეფალო-მენინგოცელები. ეს უკანასკნელი განსაკუთრებით საშიშია, რადგან შესაძლოა გართულდეს მენინგიტით, რომელიც შესაძლებელია გამოიწვიოს ბიოფსიის შემდგომმა ინფიცირებამ. ნებისმიერი სიმსივნოვანი წარმონაქმნის დიფერენციალური დიაგნოზი უნდა დაისვას CT-ს გამოყენებით.

ასევე, მცირეწლოვან და ახალშობილ ბავშვებში, ცხვირით სუნთქვის ობსტრუქციას ადენოიდური ვეგეტაციები, იგივე ადენოიდები განაპირობებენ. ამ დროს ბავშვი, განსაკუთრებით ღამით, დამახასიათებელი ხვრინვით სუნთქავს. ასევე, შესაძლოა ტონზილების ჰიპერტროფიაც იყოს ამ ობსტრუქციის მიზეზი.

მოზრდილებში და უფროსი ასაკის პაციენტებში

მოზრდილებში და უფროსი ასაკის პაციენტებში,ცხვირის ობსტრუქცია უკვე სხვა მიზეზის გამო გვხვდება. მაგ.:

— ცხვირ-ხახის სიმსივნე;

— ცხვირის ძგიდის დეფორმაცია;

— ლორწოვანი გარსის ჰიპერტროფია;

— ცხვირის პოლიპოზი;

— ცხვირის უცხო სხეული;

ცხვირით სუნთქვის ობსტრუქცია სხვადასხვაგვარად აღიქმება პაციენტებში.

ზოგს ეს ძალიან აწუხებს, ზოგს კი მნიშვნელოვანი ობსტრუქციაც შეუმჩნევლად აქვს.

თუმცა, ეს დისფუნქცია, საბოლოო ჯამში, გამოიწვევს პაციენტის გულ-სისხლძარღვთა სისტემის პათოლოგიას, ცეფალეას და რინოლალიას (ცხვირით ლაპარაკს).

NOTA BENE პატარა ბავშვებში (სასურველია დიდებშიც) ცხვირის ან ხცვირ-ხახის სიმსივნის ბიოფსია უნდა გაკეთდეს CT კვლევის შემდეგ; ცხვირის ნებისმიერი ქრონიკული და პროგრესული ობსტრუქცია, დიაგნოზის დასასმელად მოითხოვს ღრმა კვლევების ჩატარებას; ცხვირის ნებისმიერი ობსტრუქცია უნდა ჩაითვალოს პათოლოგიურ მოვლენად და მის აღმოსაფხვრელად ყველფერი უნდა ვცადოთ;

წყარო

ოტო-რინო-ლარინგოლოგია და თავ-კისრის პათოლოგიები