გაბაიძე გიორგი

14:18, 23 თებერვალი 2022-ის ვერსია

გიორგი გაბაიძე

გაბაიძე გიორგი − (1988), პოეტი. დაიბადა სოფელ ხიხაძირში (ხულო); 2010 წელს დაამთავრა ბათუმის შოთა რუსთაველის სახელობის უნივერსიტეტი. ლექსების წერა დაიწყო 2004 წლიდან. 2006 წელს გამოვიდა მისი პირველი პოეტური კრებული „მკვდარი პოეტის მთვარე“; 2008 წელს ბოლოს გამოიცა მეორე − „მომავლის მონატრება“. 2009 წელს გამოსცა კრებული „დაუსრულებელი წერილი“ (თანაავტორობით: გენრი დოლიძესთან, თაკო დიოგიძესთან და გიორგი ჭეიშვილთან). 2010 წელს გამოიცა კრებული „ა ბ გ დ“ (თანაავტორობით: როინ აბუსელიძესთან, აჩი ბერიძესთან, გენრი დოლიძესთან). 2011 წელს გამოვიდა კიდევ ერთი კრებული „მეცხრე ტალღა“, 2013 წელს − კრებული „შენელი”. არის ახალგაზრდა ლიტერატურის მოყვარულთა და ახალგაზრდა ნიჭიერი დამწყები შემოქმედების გაერთიანების „ლიტერატურული კლუბის“ დამფუძნებელი და ხელმძღვანელი, ელექტრონული ბიბლიოთეკის Litklubi.ge-ს დამფუძნებელი და მმართველი.

* * *

არავინ არ მიყვარს, საერთოდ არავინ!

მივტირი ზღვის უკან ჩაფერფლილ დაისებს,

დავდივარ ზამთარში, − მბჟუტავი ფარანით,

და ვეძებ ვინც ასე არ მიყვარს; და ისევ...

არავინ არ მიყვარს საერთოდ არავინ,

დარდისგან დალამბულ ნაკვალევს ლანდების

მივყვები და ჩემი იშლება კარავი,

სულში კი იწყება პროცესი ანთების –

გზა და გზა, მივდივარ ფიქრებში და რავი

ასე თუ ველევი გრძნობების სიცხადეს,

მინდა რომ ვუყვარდე საერთოდ არავის,

და მაინც მინდა რომ ვიღაცა მიყვარდეს.

წყარო

ქართველი პოეტები (ენციკლოპედია)