ჰოფმანი ერნსტ თეოდორ ამადეუს
ერნსტ თეოდორ ამადეუს ჰოფმანი – (24 იანვარი 1776, კენიგსბერგი – 25 ივნისი 1822, ბერლინი), გერმანელი მწერალი და კომპოზიტორი. იყო აგრეთვე რეჟისორი, დირიჟორი, მხატვარ-დეკორატორი.
1814-იდან ცხოვრობდა ბერლინში. ჰ. გერმანული რომანტიკული ლიტერატურის, მუსიკალური ესთეტიკისა და კრიტიკის ერთ-ერთი ფუძემდებელია (ნოველები „კავალერი გლიუკი,“ „იოჰან კრაისლერის, კაპელმაისტერის მუსიკალური ვნებანი“, რომანი „კატა მურის ცხოვრებისეული შეხედულებები“ და სხვ.). ჰოფმანი ერთ-ერთი პირველი რომანტიკული ოპერის „უნდინეს“ (1813), აგრეთვე სხვა ნაწარმოებების ავტორია (ოპერა „ავრორა“ 1812, სიმფონიები, კამერულ-ინსტრუმენტული ნაწარმოებები და სხვ.). გავლენა მოახდინა კ. ვებერის, რ. შუმანის, რ. ვაგნერის შემემოქმედებაზე. მისი პოეტური სახეები აღბეჭდილია შუმანის „კრაისლერიანაში“, ვაგნერის „მფრინავ ჰოლანდიელში“, ბალეტებში: „მაკნატუნა“ (ჩაიკოვსკი), „კოპელია“ (დელიბი), „ჟიზელი“ (ადანი), ოპერაში „კარდილიაკი” (ჰინდემითი). ჰოფმანი გახდა ჟ. ოფენბახის ოპერის – „ჰოფმანის ზღაპრების“ გმირი.
