კუბა
კუბა - (Republica de Cuba – კუბის რესპუბლიკა), სახელმწიფო ვესტინდოეთში, განლაგებული კუბის, ხუვენტუდისა (პინოსი) და ახლომდებარე 160-მდე მცირე კუნძულზე.
ფართობი 110,9 ათ. კმ2.
მოსახლეობა 11,4 მლნ. კაცი (2012).
ოფიციალური ენა – ესპანური.
დედაქალაქი - ქ. ჰავანა.
ადმინისტრაციულად იყოფა 14 პროვინციად და კუნძულ ხუვენტუდის საგანგებო მუნიციპიად (თვითმმართველობა).
სახელმწიფო ხელისუფლების უმაღლესი და საკანონმდებლო ორგანოა სახალხო ხელისუფლების ეროვნული ასამბლეა (ერთპალატიანი პარლამენტი). სახელმწიფოს და მთავრობის (მინისტრთა საბჭოს) მეთაურია სახელმწიფო საბჭოს თავმჯდომარე.
1902 წლის 20 მაისს კუბა დამოუკიდებელ რესპუბლიკად გამოცხადდა. 1959 წლის 1 იანვარი დამოუკიდებლობის დღეა.
კუბა აგრარულ-ინდუსტრიული ქვეყანაა. ეკონომიკის წამყვანი დარგები ეკუთვნის სახელმწიფოს. ეკონომიკის საფუძველს წარმოადგენს შაქრის ლერწმის წარმოება, ნიკელის მადნის მოპოვება. განვითარებულია საერთაშორისო ტურიზმი.
ძირითადი საზღვაო პორტებია: ჰავანა, სანტიაგო-დე-კუბა, გუანტანამო, კარდენასი.
საერთაშორისო აეროპორტი - ხოსე-მარტი (ჰავანა).
კუბის ტერიტორიაზე განლაგებულია აშშ-ის სამხედრო-საზღვაო ბაზა გუანტანამო.
შეიარაღებული ძალები საერთო შემადგენლობით 49 ათ. კაცი (2012), სახმელეთო ჯარები 38 ათ. სამხედრო-საჰაერო 8 ათ. და სამხედრო-საზღვაო ძალები 3 ათ.. დაკომპლექტება ხორციელდება გაწვევით.
