ფლოტილია
ფლოტილია - ოპერატიული გაერთიანება, ოპერატიულ-ტაქტიკური შენაერთი მთელი რიგი სახელმწიფოების საზღვაო ფლოტში (სამხედრო-საზღვაო ძალებში). გამოყენების რაიონის მიხედვით განასხვავებენ ზღვის, ტბის და მდინარის ფლოტილიებს.
ორგანიზაციის მიხედვით - ცალკეულ ან ფლოტის შემადგენლობაში შემავალს; შემადგენლობის მიხედვით - სხვადასხვა გვარეობის ან ერთი გვარეობის ძალების ფლოტილიებს.
არსებობს სხვა ფლოტილიებიც: მაგალითად, საფრანგეთის სამხედრო-საზღვაო ძალების ავიაციაში ფლოტილია ეწოდება ნავსაწინააღმდეგო თვითმფრინავების (შვეულმფრენების) რამდენიმე ქვედანაყოფის ფორმირებას.
სარჩევი |
საზღვაო ფლოტილია
მთელი რიგი ქვეყნების სამხედრო-საზღვაო ძალებში განკუთვნილია ოპერატიული ამოცანების შესასრულებლად საომარი მოქმედებების საოკეანო (საზღვაო) თეატრის ერთ საოპერაციო მიმართულებაზე, აგრეთვე დახურულ ზღვაში, როგორც დამოუკიდებლად, ისე სამხედრო-საზღვაო ძალების და შეიარაღებული ძალების სხვა სახეობების შენაერთებთან (გაერთიანებებთან) ურთიერთქმედებით. შეიძლება შედგებოდეს შენაერთების, წყალქვეშა ნავების, წყალზედა ხომალდების და კატარღებისაგან, სანაპირო ჯარების, სპეციალური ჯარების ნაწილებისაგან, ლოგისტიკის შენაერთების ნაწილებისაგან.
ფლოტილიის ოპერატიულ დაქვემდებარებაში შეიძლება გადაეცეს საზღვაო ავიაციის ნაწილები. სამხედრო-საზღვაო ფლოტში (სამხედრო-საზღვაო ძალებში) შეიძლება გაერთიანდეს ძალების ერთი გვარეობის რამდენიმე შენაერთი: წყალქვეშა ნავების, საესკადრო ნაღმოსნების, ნავსაწინააღმდეგო ხომალდების ფლოტილიები და სხვა.
სამდინარო ფლოტილია
განკუთვნილია სახმელეთო ჯარების ხელშეწყობისათვის საბრძოლო მოქმედებების წარმოებისას მდინარეების აუზებში მოწინააღმდეგის სამდინარო ხომალდების, გემების და სადესანტო საშუალებების განადგურების, მის ობიექტებსა და ჯარებზე დარტყმების მიყენების, დესანტის გადასხმის, ჯარების გადაყვანის და სხვა ამოცანების შესრულების გზით.
ფლოტილიის შემადგენლობაში შეიძლება შედიოდეს სამდინარო ხომალდების რამდენიმე ბრიგადა და ლოგისტიკის ნაწილები.
ტბი ფლოტილია
განკუთვნილია სახმელეთო ძალების ხელშეწყობისათვის ტბისპირა რაიონებში მიმდინარე საბრძოლო მოქმედებების დროს, მოწინააღმდეგის ხომალდების და გემების განადგურების, მისი სამხედრო გადაზიდვების ჩაშლის, სანაპირო ობიექტებზე დარტყმების მიყენების, საკუთარი კომუნიკაციების დაცვის, დესანტის გადასხმისა და სხვა ამოცანების შესრულების დროს.
ფლოტილიის შემადგენლობაში შეჰყავთ სხვადასხვა კლასის ხომალდების და კატარღების შენაერთები, ლოგისტიკის ნაწილები და დაწესებულებები; ზოგჯერ - სანაპირო არტილერიის ნაწილები.
საომარი მოქმედებების დაწყებისას ტბის ფლოტილიას, ჩვეულებრივ, დაჯგუფების ოპერატიულ დაქვემდებარებაში გადასცემენ. იქმნება, როგორც წესი, ომიანობის დროს.
ფლოტილიას უწოდებენ სამოქალაქო გემების გაერთიანებას საქმიანობის მიხედვით - თევზსაჭერი, ვეშაპსანადირო ფლოტილიები და სხვა.
