ამადა

ამადა – სოფელი ასუანიდან 200 კმ სამხრეთით, სადაც მდებარეობს XVIII დინასტიის ფარაონების თოტმეს III-ის და ამონხეტეპ II-ის მიერ აგებული ცნობილი ამადას ტაძარი, მიძღვნილი ამონ-რასა და რა-ხორახტისადმი. ტაძრის ფასადი დაასრულა სეტი I-მა, რომელმაც მას პატარა პილონი მიუშენა.

1964-1975 წწ. ასუანის კაშხალის აგებასთან დაკავშირებით ტაძარი გადააადგილეს დაახლ. 65 მეტრით ზევით და 2 კილომეტრით უკან. პირველმა ტაძარი შეისწავლა ა. გოტიემ. ტაძრის კედლებზე მოთავსებულია ორი მნიშვნელოვანი წარწერა: ერთი მოგვითხრობს ამონხეტეპ II-ის მიერ შვიდი Takhesy-ს (სირია) ბელადის გაჟლეტის შესახებ, მეორე კი მერნეპტახის დროს ეგვიპტეში ლიბიელების შეჭრაზე.

წყარო

ძველი ეგვიპტის ენციკლოპედია