გეოგრაფიული ბადე
გეოგრაფიული ბადე – (geographical grid, graticule), მერიდიანებისა და პარალელების წარმოსახვითი ბადე ელიფსოიდზე და სფეროზე. გამოიყენება დედამიწის ზედაპირის წერტილთა კოორდინატების – განედის (φ) და გრძედის (λ) ათვლისათვის. მოცემული პარალელის გასწვრივ ყოველ წერტილს ერთი და იგივე განედი აქვს, ე.ი. ერთი და იგივე გრადუსული ზომით არის დაშორებული ეკვატორის სიბრტყიდან. მოცემული მერიდიანის წერტილებს ერთი და იგივე გრძედი აქვთ, ე.ი. ერთი და იგივე გრადუსული ზომით არიან დაშორებული საწყისი მერიდიანის სიბრტყიდან. გრადუსული ზომების გადაყვანა შეიძლება სიგრძის ერთეულებში. ეკვატორის და მერიდიანის 1º = 111 კმ (40 000 კმ : 360º). პარალელების სიგრძე კი ეკვატორიდან პოლუსებისკენ კლებულობს, ამიტომ თითოეული პარალელის სიგრძეს ვიგებთ სპეციალური კარტოგრაფიული ცხრილებიდან.
