ვეჯვუდი
ვეჯვუდი – ჩიზვიქისა და სთოურჰედის მსგავსი ქალაქგარეთ ნაგები სახლების ინტერიერის დიზაინი, გარკვეულწილად, ბრიტანელი არისტოკრატების კოლექციების განსათავსებლად იყო შექმნილი. კოლექციები, სიძველეებთან ერთად, კლასიცისტური მხატვრობის, სკულპტურისა და დეკორატიული ხელოვნების ნიმუშებს შეიცავდა.
კლასიცისტური დეკორატიული ხელოვნების ყველაზე წარმატებული მწარმოებელი ჯოშუა ვეჯვუდი (Josiah Wedgwood, 1730-1795) იყო. 1769 წელს მან მშობლიურ სოფელ ბერსლემთან ახლოს კერამიკის ქარხანა გახსნა, რომელსაც კერამიკით განთქმული ეტრუსკული კულტურის ანალოგიით, ეტრურია უწოდა. წარმოება რამდენიმე განყოფილებისგან შედგებოდა, თითოეული თავისი გამოსაწვავი ღუმელით და ცალკეულ სპეციალობებში დაოსტატებული მუშებით. 1770-იან წლებში ნიჭიერმა ქიმიკოსმა ვეჯვუდმა სრულყოფილებამდე მიიყვანა წვრილმარცვლოვანი მოუჭიქავი ფერადი კერამიკა, რომელსაც თავად ჯასფერვეას (jasperware) უწოდებდა. მისი ყველაზე ცნობილი ჯასფერვეა ცისფერ ფონზე გამოსახული თეთრფიგურებიანი ნივთებია; მაგალითად, როგორიცაა ლარნაკი ჰომეროსის აპოთეოზი . ლარნაკის დაბალი რელიეფით შესრულებული დეკორის კომპოზიცია მოქანდაკე ჯონ ფლაქსმან უმცროსს ეკუთვნის, რომელიც ვეჯვუდისთვის 1775-1787 წლებში მუშაობდა. რელიეფი ფლაქსმანმა ცნობილი კოლექციონერისა და ვეჯვუდის ერთ-ერთი მთავარი მფარველის, უილიამ ჰამილთონის (1730-1803) ბიბლიოთეკაში დაცული ბერძნული ჭურჭლის შესახებ დაწერილ წიგნში მოცემული ილუსტრაციის მიხედვით შექმნა. ფლაქსმანმა გაამარტივა ორიგინალის დიზაინი, რათა ანტიკური ხანის ბერძნულ ხელოვნებაზე არსებული იდეალიზებული წარმოდგენები მასობრივი წარმოების მოთხოვნებისთვის შეეთავსებინა.
განმანათლებლობის იდეებით გატაცებული ვეჯვუდი ფაბრიკის მუშების კეთილდღეობაზე ზრუნავდა და მათთვის სოფელიც კი ააშენა. იგი მონებით ვაჭრობის წინააღმდეგ და მონობის გაუქმებისთვის არსებული საერთაშორისო მოძრაობის აქტიური მონაწილე იყო. ამ მოძრაობის მხარდასაჭერად მან მოქანდაკე უილიამ ჰექვუდს (William Hackwood, 1757-1839) 1787 წელს დაარსებული მონებით ვაჭრობის აკრძალვის ბრიტანული კომიტეტის ემბლემა შეუკვეთა. ჰექვუდმა მცირე ზომის შავ-თეთრი ჯასფერვეას მედალიონი შექმნა მასზე გამოსახული ჯაჭვით დაბმული, მუხლებზე დაცემული აფრიკელის კამეოსმაგვარი ფიგურით და წარწერით: "განა მე ადამიანი და თქვენი ძმა არ ვარ?" . მედალიონის ასლები ვეჯვუდმა ფილადელფიის მონობის ამკრძალავი კომიტეტის პრეზიდენტს, ბენჯამინ ფრანქლინს და მოძრაობის სხვა წევრებს გაუგზავნა. გამოსახულება იმდენად შთამბეჭდავი აღმოჩნდა, რომ მოგვიანებით ამერიკის შეერთებულ შტატებში საარჩევნო უფლებებისთვის მებრძოლ ქალთა მოძრაობამ ეს მოტივი საკუთარი ლოგოსთვის გამოიყენა, ოღონდ, მამაკაცის ფიგურა ქალის გამოსახულებით ჩაანაცვლა და წარწერაც შესაბამისად შეცვალა: "განა მე ქალი და თქვენი და არ ვარ?"
