რამსეს IV
რამსეს IV – ეგვიპტის XX დინასტიის ფარაონი (ჩვ.წ.-მდე 1156-1151 წწ.) რამსეს III-ის მეხუთე ვაჟიშვილი იყო. რამსეს III-მ ის დანიშნა თავის მემკვიდრედ თავისი მეფობის ოცდამეორე წელს, მეოთხე უფროსი ვაჟიშვილის გარდაცვალების შემდეგ. სავარაუდოდ, ტახტზე ასვლის დროისათვის ის დაახლოებით ორმოცი წლის იყო.
მან არა მარტო მოაგვარა დეირ ელ-მედინეს პრობლემა, არამედ გააორმაგა მისი მოსახლეობა, რადგან ტახტზე ასვლისთანავე დაიწყო გრანდიოზული სამშენებლო პროექტები. მან საგრძნობლად გაზარდა მამის მიერ დაწყებული ხონსუს ტაძარი და დაიწყო გრანდიოზული მოსახსენიებელი ტაძრის მშენებლობა ხატშეპსუტის დეირ ელ-ბაჰარის ტაძრის სიახლოვეს. შემონახულია ორი სტელა ვადი ჰამამატის ქვის სამტეხლოებიდან. პირველზე ის გვამცნობს, რომ თავად იმოგზაურა სამტეხლოებისაკენ, რადგან ჰქონდა ზმანება. მეორე სტელიდან ვიგებთ, რომ მეფობის მესამე წელს სამტეხლოებში 8368 კაცისაგან შემდგარი ექსპედიცია გაგზავნა. ჩვენამდე მოაღწია ასევე უაღრესად საინტერესო დოკუმენტმა (აბიდოსის სტელა), რამსეს IV-ის ლოცვამ, რომელშიც ის ევედრება ღმერთს, მისცეს მეფობის მეტი წლები, ვიდრე მის ცნობილ სეხნიას, რამსეს II-ს ჰქონდა. მიუხედავად ასეთი ვედრებისა, რამსეს IV მეფობის მეექვსე წელს გარდაიცვალა.
