რენენუტეტი
რენენუტეტი – (ეგვ. Rnn.t, Runwt.), გველის სახის მქონე მოსავლის, საკვების და სამოსის ქალღმერთი. გამოისახებოდა მოსავალის აღების და ღვინის დაწურვის სცენებთან გველის ან გველისთავიანი ქალის სახით ძველი სამეფოს დროიდან. ბერძნები ეძახდნენ Thermuthis. მისი სახელი ერქვა ეგვიპტური კალენდრის მერვე თვეს (Pharmuthis). ითვლებოდა, რომ მოსავალი მისი კურთხევით მოიწეოდა, რადგან „ნაყოფიერი მიწის“ და „ბეღლების ქალბატონი“ იყო.
რენენუტეტი იყო ასევე „ქსოვილების და ტანსაცმლის დამზადების ზედამხედველი“ ტაძრებში და ითვლებოდა, რომ ღმერთებს და მეფეებს რენენუტეტის ტანსაცმელი ეცვათ. მისი ეს ფუნქციაც მოსავალთან იყო დაკავშირებული, რადგან ეს განსაკუთრებით თხელი ქსოვილი სელისაგან მზადდებოდა. თერმუტისის ქსოვილს მაგიური ძალა მიეწერებოდა. იყო ასევე სიხარულის და კეთილდღეობის პერსონიფიკაცია. მოგვიანებით მას ადამიანის ბედის განმსაზღვრელადაც მიიჩნევდნენ, რომელიც იხედებოდა დროში და ადამიანის ცხოვრების წლების რაოდენობას ადგენდა. ამიტომ მოხდა მისი დაახლოება ბედის ღმერთთან, შაისთან. ითვლებოდა ასევე, რომ მესხენტთან ერთად ეხმარებოდა ბავშვს დაბადებისას და მასში ცხოვრების სურვილს აძლიერებდა.
პირამიდების ტექსტებში ფარაონის ურეუსთან არის იდენტიფიცირებული (PT 302, 454). რენენუნეტი საერთო ეგვიპტური ქალღმერთი იყო და საკულტო ადგილები სხვადასხვაგან ჰქონდა. მისი დღესასწაული იყო მერვე, მისივე სახელის მქონე თვეში, როცა მოსავალს იღებდნენ. ეს დღესასწაული ასევე მარცვლის ღმერთის, ბავშვის იკონოგრაფიის მქონე ნეპერის დაბადების დღედ იყო მიჩნეული. რენენუტეტი ხშირად გამოისახებოდა ჩვილი ნეპერით კალთაში და ამ სახით ხანდახან ისიდასთან და ჩვილ ხორთან იყო გაიგივებული.
