აუსტერლიცის ბრძოლა
აუსტერლიცის ბრძოლა - გადამწყვეტი ბრძოლა აუსტერლიცის (ახლანდელი – ქ. სლავკოვი, ჩეხეთი) მიდამოებში რუსეთ-ავსტრიისა და საფრანგეთის ჯარებს შორის 1805 წლის 20 ნოემბერს (2 დეკემბერს) რუსეთ-ავსტრია-საფრანგეთის ომის დროს.
ფრანგულმა არმიამ ნაპოლეონ I-ის სარდლობით (73 ათ. კაცი, 250 ქვემეხი) დაამარცხა რუსეთ-ავსტრიის ჯარები (81,5 ათ. კაცი, 350 ქვემეხი), რომლებსაც მეთაურობდა გენერალი მ. კუტუზოვი.
მოკავშირეთა კოალიციამ დაკარგა – 27 ათ. კაცი და 185 ქვემეხი; ფრანგებმა – 12 ათ-ზე მეტი ადამიანი.
ნაპოლეონის გამარჯვებამ აუსტერლიცის ბრძოლაში ცხადყო საფრანგეთის არმიის ახალი სამხედრო სისტემის (გაფანტულ წყობასთან შეჯერებული კოლონების ტაქტიკის) უპირატესობა რუსული და ავსტრიული არმიების მოძველებულ სამხედრო სისტემებსა და ხაზოვან ტაქტიკაზე.
აუსტერლიცის ბრძოლის შემდეგ მესამე ანტიფრანგული კოალიცია დაიშალა.
