აშლილობა გამოწვეული კანაბინოიდების მოხმარებით
აშლილობა გამოწვეული კანაბინოიდების მოხმარებით - (cannabinoid use disorder), კანაბისის ან მისი ალკალოიდების მიღების შედეგად გაჩენილი ნებისმიერი ფსიქიკური ან ქცევითი აშლილობა.
კანაბისი, მისი ალკალოიდები, კერძოდ კი ტეტრაჰიდროკანაბინოლი (ტჰკ) ინდური კანაფის აქტიური ინგრედიენტებია. კანაბისი აგრეთვე მარიხუანას, ჰაშიშის, „ბალახის“ და სხვა სახელითაა ცნობილი. მას ძირითადად ეწევიან. თვით ნივთიერების ან მისი მეტაბოლიტების შარდში აღმოჩენა შესაძლოა მწვავე ინტოქსიკაციის სინდრომის გაქრობიდან 48-72 საათის შემდეგ.
კანაბისით ინტოქსიკაცია ხელს უშლის ავტო ან საჰაერო ტრანსპორტის მართვაში და აგრეთვე გავლენას ახდენს სხვა რთულ ფუნქციებზე, რომლებიც გარკვეულ უნარებს მოითხოვს. ის ხანმოკლე მეხსიერების, ყურადღების დარღვევას იწვევს, ზრდის რეაქციის დროს, აქვეითებს დასწავლის უნარს, მოტორულ კოორდინაციას, აღქმის სიღრმეს, პერიფერიულ მხედველობას, ცვლის დროის აღქმას (ჩნდება დროის შენელების შეგრძნება), არღვევს სიგნალების აღმოჩენის უნარს.
ინტოქსიკაციის სხვა ნიშნებია: გამოხატული შფოთვა, დაეჭვება, პარანოიდული იდეები, ეიფორია ან აპათია, განსჯის უნარის დარღვევა, სკლერის ინექცია, მადის მომატება, პირის სიმშრალე, ტაქიკარდია.
კანაბისი ხშირად ალკოჰოლთან ერთად მიიღება, რაც აძლიერებს მის ეფექტს. მისმა ყოველდღიურმა მასიურმა ხმარებამ შესაძლოა ქრონიკული ამოტივაციური სინდრომი გააჩინოს, რომელიც ენერგეტიკული პოტენციალისა და ზრახვათა დონის დაქვეითებით, მიზანდასახულობის დაკარგვითა და ძველი ინტერესებიდან განდგომით ხასიათდება.
შიზოფრენიით დაავადებულში კანაბისის მიღებამ შესაძლოა რეციდივის პროვოცირება მოახდინოს. ცნობილი გახდა, რომ კანაბისით ინტოქსიკაციის ფონზე მწვავე ბოდვითი აშლილობები ვითარდება, რომლებიც შესაძლოა რამდენიმე დღე გაგრძელდეს.
იხილე აგრეთვე
აშლილობა გამოწვეული ფსიქოაქტიური ნივთიერებების მოხმარებით
