პატარა მეჯვრისხევის წმინდა გიორგის ეკლესია
პატარა მეჯვრისხევის წმინდა გიორგის ეკლესია - ეკლესია დგას საქართველოში, შიდა ქართლის მხარეში, გორის მუნიციპალიტეტში, სოფელ პატარა მეჯვრისხევის, ჩრდილო-დასავლეთით 0,5 კილომეტრზე სასაფლაოზე. ძეგლი თარიღდება XVI-XVIII საუკუნეებით.
აღწერილობა
ეკლესია დარბაზულია (7X4,7 მ), ნაგებია რიყის ქვით და აგურით თაღოვანი შესასვლელი სამხრეთითაა. ნახევარწრიულ აფსიდში ერთი სარკმელი და ორი ღრმა ნიშია. სარკმლის ქვემოთ ოთხკუთხა სატრაპეზო ქვა დგას. დასავლეთ და სამხრეთ კედელში თითო სარკმელია. სამხრეთ კედლის სარკმელი ამოშენებულია. დარბაზის გრძივ კედლებზე პილასტრებია, რომლებსაც ეყრდნობოდა ცილინდრული კამარის საბჯენი თაღი. სამხრეთ ფასადზე, კარის ორივე მხარეს, აგურით გამოყვანილია დეკორატიული რომბები. დასავლეთ ფასადზე შემორჩენილია შირიმის ლავგარდნის ფრაგმენტები. სახურავი ორფერდაა, კრამიტის. ეკლესიის სახურავზე, დასავლეთით, ადგას აგურის სამრეკლო.