ტეთისი

ტეთისი – (ბერძნ.) ტიტანიდა. ურანოსისა და გეას ასული. ოკეანოსის და და მეუღლე. სამი ათასი ოკეანიდისა და ყველა მდინარის დედა.

ბერძენთა რწმენით, ტეთისმა მიანიჭა სასიცოცხლო ძალა ყველას და ყველაფერს, რაც არსებობდა. ამიტომ მას „ყოველთა დედად“ მიიჩნევდნენ.

ტეთისმა და ოკეანოსმა შეიფარეს ჰერა, როდესაც მისი მომავალი მეუღლე, ზევსი, ტიტანებს ებრძოდა. ოლიმპოსზე დავანების შემდეგაც ღმერთების დიდი ქალბატონი ხშირად მოინახულებდა ხოლმე თავის აღმზრდელებს.

ოკეანოსი და ტეთისი ზღვის სტიქიას განასახიერებდნენ და მათ საერთო საკურთხევლებს უგებდნენ. მოგვიანებით ტეთისს ისისსთან აიგივებდნენ. ხშირად ტეთისის სახელს მცდარად წარმოთქვამდნენ. არ უნდა დაგვავიწყდეს, რომ თეტისი აქილევსის დედას ერქვა.

წყარო

მითოლოგიური ენციკლოპედია ყმაწვილთათვის