კამოსე
კამოსე – XVII (თებეს) დინასტიის და მეორე გარდამავალი პერიოდის ბოლო ფარაონი (დაახლ. XVI ს.-ის მეორე ნახევარი), რომელმაც განახორციელა აქტიური შეტევა ჰიკსოსებზე. შემონახულია ორი სტელა კარნაკში, რომლებიც კამოსეს ბრძოლებზე მოგვითხრობს. ტექსტის დასაწყისში გაღიზიანებული კამოსე ამბობს, რომ ჩრდილოეთში ზის აზიელი, სამხრეთში კი ნუბიელი როგორც ჩანს, ჰიკსოსების დროს ეგვიპტე სათანადოდ ვეღარ აკონტროლებდა ნუბიას), თითოეულს ეგვიპტის ნაწილი უკავია და თვითონ ის კი იტანს თანამმართველობას აზიელთან და ზანგთან. ამის შემდეგ, მისი მრჩეველების წინააღმდეგობის მიუხედავად, კამოსე იწყებს ბრძოლას. ის იპყრობს ჰიკსოსების ფორტებს ჰიკსოსების მიერ კონტროლირებადი ტერიტორიის სიღრმეში, შემდეგ ხელში იგდებს ჰიკსოსების გემებს, დატვირთულს „რეჩენუს (სირია-პალესტინა) ყოველგვარი კარგი ნივთებით“, იპყრობს ასევე კინოპოლისის ნომს, რომელიც ფაიუმის ოაზისიდან მხოლოდ 100 კილომეტრით იყო დაშორებული, და აგზავნის ჯარს სტრატეგიულად მნიშვნელოვან ბახრიას ოაზისში. კამოსეს მეორე სტელაზე პირველად არის დაფიქსირებული სიტყვა „ცხენი“ ეგვიპტურ ტექსტში. თავისი ბრძოლებით კამოსემ მოამზადა ნიადაგი ჰიკსოსების საბოლოო განდევნისათვის, მაგრამ ეს მოახერხა უკვე მისმა მემკვიდრემ და უმცროსმა ძმამ, იახმეს I-მა, რომლის გამეფებითაც ახალი სამეფოს ეპოქა იწყება.
