მსოფლიოს საერთაშორისო რუკა 1:1 000 000
მსოფლიოს საერთაშორისო რუკა 1:1 000 000 – (International Map of the World 1:1 000 000), მსოფლიოს ზოგადგეოგრაფიული საცნობარო რუკა 1:1 000000 მასშტაბში. გადაწყვეტილება რუკის შედგენის შესახებ მიიღეს 1891 წელს საერთაშორისო გეოგრაფიული კავშირის მე-5 კონგრესზე, გერმანელი გეოგრაფის ალბრეხტ პენკის წინადადებით. მომდევნო მე-6 (1895 წ.), მე-7 (1899 წ.), მე-8 (1904 წ.) და მე-9 (1908 წ.) კონგრესებზე განიხილებოდა რუკაზე მუშაობის მიმდინარეობა. რუკის საბოლოო „ეტალონი“ დადგინდა 1913 წელს კარტოგრაფიული ბადის სტანდარტებით (განედთა სხვაობა 4°, გრძედთა სხვაობა 6°) და ერთიანი პირობითი აღნიშვნებით. რუკის გეოგრაფიული სახელწოდებების სტანდარტების დადგენა შესაძლებელი გახდა 1953 წლიდან, როდესაც რუკაზე მუშაობის ხელმძღვანელობა დაეკისრა გაერო-ს კარტოგრაფიულ სამსახურს.
ამჟამად, მსოფლიოს მილიონიანი რუკა ერთიანი ნომენკლატურით, კარტოგრაფიული პროექციითა და პირობითი აღნიშვნებით გამოცემულია ყველა კონტინენტისა (ანტარქტიდის ჩათვლით) და ქვეყნისათვის, ცალკცალკე ფურცლებად. წარწერები შესრულებულია იმ ქვეყნის ენაზე, რომელიც გამოსცემს რუკას.
