პითომი

პითომი – (ეგვ. Pr Tm, „ატუმის სახლი“), მერვე ქვემოეგვიპტური ნომის დედაქალაქი. ბიბლიაში (გამოსვლა, I:11) პითომი და პი-რამსესი ერთად არიან დასახელებული, როგორც ქალაქები, სადაც ეგვიპტის ფარაონი ისრაელის შვილებს ამუშავებდა. ამდენად, ეს ორი ქალაქი ქრონოლოგიურად ერთ ჩარჩოში არის მოქცეული, მაგრამ პითომის (თანამედრ. თელ ელ-მასხუტასთან) გათხრებმა ცხადყო, რომ პითომი დააარსა ფარაონმა ნეხო II-მ ჩვ.წ.-მდე 609-606 წლებს შორის. ამ დროისათვის პი-რამსესი უკვე ფაქტობრივად აღარ არსებობდა და მისი ქანდაკებები და ნაგებობები ტანისში იყო გადატანილი. შესაბამისად, ებრაელების მუშაობა პითომში ეგვიპტიდან გამოსვლამდე ანაქრონიზმია. მეორე მხრივ, სავსებით დასაშვებია, რომ ომის ტყვეები ისრაელის ყოფილი ტერიტორიიდან ან იუდეიდან, რომლებიც ნეხომ სავარაუდოდ თავისი 609 წლის კამპანიიდან ჩამოიყვანა, მუშაობდნენ სამშენებლო სამუშაოებზე ჩრდილო-აღმოსავლეთ ეგვიპტეში. შესაძლოა ასევე, რომ ებრაელები, რომლებიც უკვე ცხოვრობდნენ ეგვიპტეში, აყვანილი იყვნენ ასეთი სამუშაოებისათვის. რადგან პი-რამსესი და პითომი არ არსებობდნენ ერთდროულად, დღეს ბიბლიური ცნობის ორი ახსნა არსებობს: ან „გამოსვლაში“ მეორე და პირველი ათასწლეულების ამბებია არეული, ან რამსესის ქალაქად მოხსენიებულია ტანისი, სადაც რამსეს II-ის კულტი ჯერ კიდევ ელინისტურ პერიოდში არსებობდა.

წყარო

ძველი ეგვიპტის ენციკლოპედია