უშებტი
უშებტი – (ასევე შევაბტი, ეგვ. wšb.tj, „პასუხის გამცემი“), პატარა, ძირითადად მუმიის ფორმის ფიგურები, რომლებსაც ეგვიპტეში მიცვალებულს სამარხში ატანდნენ. ისინი შეიძლება ყოფილიყო თიხის, ხის, ქაშანურის ან ქვის.
უშებტი ჩნდება შუა სამეფოდან, XVIII დინასტიიდან კი მათი რიცხვი ძალიან იზრდება. უშებტის დანიშნულებას ვიგებთ ტექსტიდან, რომელსაც მათ სხეულზე წერდნენ და რომელიც მკვდართა წიგნშიც (VI თავი) გვხვდება: „შენ, უშებტი, როცა მე დამიძახებენ, რომ შევასრულო სამუშაო, რომელიც იმქვეყნიურ სამყაროში სრულდება… შენ მაშინ თქვი: აქა ვარ“. ე.ი. უშებტის უნდა შეესრულებინა სამუშაო, რომელსაც გარდაცვლილს იმქვეყნიურ სამყაროში დაავალებდნენ. ამიტომ უშებტის თან ატანდნენ შრომის იარაღს, მოგვიანებით კი ზედ ახატავდნენ.
სამარხში უშებტის ათავსებდნენ იგივე ადგილას, სადაც ძველი და შუა სამეფოს დროს მსახურების ფიგურები იყო, მაგრამ ამ ორი ტიპის ფიგურების არსება ძირეულად განსხვავდება: მსახურების ფიგურებს თვით გარდაცვლილის მომსახურება „ევალებოდათ“, უშებტის კი იმ სამუშაოს შესრულება, რომელსაც გარდაცვლილს „დაავალებდნენ“. უშებტის ფიგურები ჩვეულებრივ სპეციალურ ყუთში თავსდებოდა. ასეთი ყუთები, რომლებიც ხელშეუხებლად იქნა ნაპოვნი, გვამცნობს, რომ მათი იდეალური რიცხვი იყო 401. 365 ფიგურა განკუთვნილი იყო წლის დღეებისათვის, და მათ „ჰყავდათ“ 36 ზედამხედველი, ათდღიანი პერიოდისათვის (ეგვიპტური თვე სამ ათდღიან „კვირად“ იყო დაყოფილი), როგორც ეს „ამქვეყნიურ“ ეგვიპტეში იყო მიღებული.
