ბერბუკის კოშკი
ბერბუკის კოშკი - კოშკი მდებარეობს საქართველოში, შიდა ქართლის მხარეში, გორის მუნიციპალიტეტში, მისგან ჩრდილოეთით 5 კილომეტრში, მდინარე მეჯუდას მარცხენა ნაპირას მდებარე სოფელ ბერბუკისს განაპირას სამხრეთით. თარიღდება გვიანდელი ფეოდალური ხანით.
აღწერილობა
კოშკი ცილინდრულია (დიამეტრი 7,7 მ) სამსართულიანი. ნაგებია რიყის ქვითა და კვადრატული აგურით. კოშკი დაზიანებულია: დანგრეულია პირველი სართულის სამხრეთ კედელი, მეორე სართულის კედლების ზედა და მესამე სართულის კედლების უმეტესი ნაწილი. კოშკში შესასვლელი მეორე სართულზეა, ჩრდილოეთით. პირველი სართულის აღმოსავლეთ კედელში კვადრატული აგურის თაღოვანი ბუხარია, ჩრდილო-აღმოსავლეთით კი ორი ორმაგი თახჩიანი სათოფური. სამხრეთის კედელში დატანებულია მეორე სართულზე ასასვლელი კიბე. სართული შელესილია. მეორე სართულის ჩრდილოეთ კედელში, კარის ორივე მხარეს, თითო ორმაგი თახჩიანი სათოფურია. ასეთივე სათოფურები სამხრეთ და აღმოსავლეთ კედლებშიცაა. სართული შელესილი ყოფილა. შენობას შემოვლებული აქვს თევზიფხურად ნაწყობი რიყის ბრტყელი ქვის სარტყლები.
ბიბლიოგრაფია
- ბერბუკის კოშკი და მთავარანგელოზის ეკლესია //საქართველოს ისტორიისა და კულტურის ძეგლთა აღწერილობა.ტ.5.-თბ.,1990.-გვ.48.
- სოფ. ბერბუკის კოშკისა და 1830 წელს გიგაურების მიერ აგებული მთავარანგელოზის სახელობის ეკლესიის ხუროთმოძღვრული დახასიათება.
