გაიანა
გაიანა (Gayana – კოოპერაციული რესპუბლიკა გაიანა) – სახელმწიფო სამხრეთ ამერიკის ჩრდილო-აღმოსავლეთ ნაწილში. ქვეყნის ჩრდილოეთით ესაზღვრება ატლანტის ოკეანე, დასავლეთით – ვენესუელა, სამხრეთ-დასავლეთით – ბრაზილია, აღმოსავლეთით – სურინამი.
ფართობი – 215 ათ. კმ2.
მოსახლეობა – 761,4 ათ. კაცი (2012).
ოფიციალური ენა – ინგლისური.
დედაქალაქი – ქ. ჯორჯტაუნი.
ადმინისტრაციულად იყოფა 10 ოლქად. გაიანა შედის დიდი ბრიტანეთის თანამეგობრობაში.
სახელმწიფოსა და მთავრობის მეთაურია პრეზიდენტი. საკანონმდებლო ორგანო – ეროვნული კრება (ერთპალატიანი პარლამენტი).
დამოუკიდებლობა გამოაცხადა 1966 წლის 26 მაისს.
ეკონომიკის საფუძველს წარმოადგენს სოფლის მეურნეობა და სამთომოპოვებითი მრეწველობა. მსოფლიოში მოწინავე ადგილი უკავია ბოქსიტების მოპოვებაში.
საზღვაო პორტებია: ჯორჯტაუნი, ფორტ-უელინგტონი, ნიუ-ამსტერდამი.
საერთაშორისო აეროპორტია – ტიმეხრი (ჯორჯტაუნი).
შეიარაღებული ძალების საერთო რაოდენობა 1,1 ათ. კაცი (2012), სახმელეთო ჯარები 0,9 ათ., სამხედრო-საჰაერო ძალები 0,1 ათ. და სანაპირო დაცვა 0,1 ათ. დაკომპლექტება ხორციელდება დაქირავებით.
