ბენბენი
NPLG Wiki Dictionaries გვერდიდან
ბენბენი – ობელისკის ფორმის უძველესი ქვის ფეტიში ჰელიოპოლისში. ითვლებოდა ატუმის პირველქმნილ სახედ, როცა ის პირველყოფილი წყლებიდან ამოვიდა ბორცვის სახით. ატუმის რასთან შერწყმის შემდეგ რას სიმბოლოც გახდა. მზის ტაძრები, რომლებსაც V დინასტიის ფარაონები რას უგებდნენ, შემოღობილ ეზოში, ღია ცის ქვეშ მდგომ ბენბენის ფორმის ობელისკებს წარმოადგენდა. წმინდათა წმინდა საკანს მზის ტაძარში, სადაც ჩვეულებრივ რას ქანდაკება იდგა, „ბენბენის სახლი“ ერქვა. განსაკუთრებით უნდა აღინიშნოს, რომ „ბენბენის სახლი“ ეხნატონის ატონის ტაძარშიც კი იყო.
