გობეჩია მელიტონ

მელიტონ გობეჩია

გობეჩია მელიტონ – (1878 – 1914), პოეტი, მწერალი, პუბლიცისტი. დაიბადა ზუგდიდის სოფელ ჭახვინჯში. 1910 წელს დაამთავრა სორბონის უნივერსიტეტი. 1897 წლიდან მასწავლებლობდა; 1905 წ იყო გაზეთ „ცნობის ფურცლის” კორესპონდენტი ზუგდიდის მაზრაში; მოღვაწეობდა „სახალხო გაზეთში”; 1911 წელს დააპატიმრეს, გარდაიცვალა ხარკოვის ციხეში.მას ეკუთვნის ლექსების კრებული – „ჰანგები” (1902), „პარიზის სონეტები” (1910); ორი პოემა – „ფარნაოზი” და „ამირანი”; ეწეოდა მთარგმნელობით საქმიანობასაც.

პარიზული სონეტებიდან

II. ვიქტორ ჰიუგოს სახლ-მუზეუმი

ვით სალოცავი წმინდა ტაძარი,

თავისუფალი ერის დიდება,

მიზიდავს შენი მყუდრო სახლ-კარი,

რაც შენი სახე თვალ-წინ მიდგება.

ტკბილო მგოსანო! ბაღი ნარნარი

წინ მოედანზე კოხტად იშლება;

შენთ უკვდავ გმირთა მწყობრი ლაშქარი

თითქოს დარბაზში ცოცხალი სდგება...

მიყვარს სახსოვარ საგანთა მზერა,

კედლით გადმომცქერ სურათთ შეფრქვევა

და შენი ჩანგის იდუმალ ჟღერა.

გრძნეულის ჰანგით მაღლა მეწევა

განუწყვეტელი შენი სიმღერა

და ციურ ნამად გულზე მეფრქვევა.

წყარო

ქართველი პოეტები (ენციკლოპედია)