ნეფერტუმი
ნეფერტუმი – (ეგვ. Nfrtm), ღმერთი-ლოტოსი, სავარაუდოდ ჰელიოპოლისის ქურუმების ქმნილება, რომელიც უძველესი დროიდან მზის კულტთან იყო დაკავშირებული. შესაძლოა ასევე, რომ მისი სახელი ნიშნავს „ატუმი იბადება თავიდან“. მოგვიანებით ის მემფისის ტრიადის წევრი ხდება, როგორც პტახის და მისი მეუღლის, სახმეტის ვაჟიშვილი, და „მკვდართა წიგნში“ მოიხსენიებენ, როგორც „მემფისში წარმოქმნილს“.
ნეფერტუმი იყო უძველესი ღმერთი, დაკავშირებული კოსმოგონიურ მითთან ლოტოსის შესახებ. ამ მითის თანახმად, პირველყოფილი ქაოსური წყლებიდან წარმოქმნილ ბორცვზე იშლება ლოტოსის ყვავილი, რომელიც ანათებს წყვდიადში მყოფ სამყაროს. ლოტოსში, რომელიც აფრქვევს სასიამოვნო სურნელს, ზის პირველქმნილი „ღმერთი ყვავილზე“, რომლის დაბადებასთან ერთად იქმნება სამყარო.
დროთა განმავლობაში რა, როგორც უზენაესი ღვთაება, ეგვიპტელებმა თითქმის ყველა კოსმოგონიურ სისტემას დაუკავშირეს. მზის ღმერთის ასიმილირება მითთან ლოტოსის შესახებ ნეფერტუმის საშუალებით მოხდა. ამ კავშირის შედეგი იყო წარმოდგენა მზეზე, როგორც რა-ნეფერტუმზე, რომელიც სამყაროს შექმნის დროს ზეცაზე პირველყოფილი ლოტოსის ყვავილიდან აღზევდება. პირამიდების ტექსტებში ნეფერტუმი ორჯერ არის მოხსენიებული, და ორივეჯერ რასთან კავშირში. ერთი გამონათქვამის თანახმად, „როცა რა ორივე ენეადის ბატონი იყო, ნეფერტუმი ადამიანებზე ბატონობდა“, მეორე გამონათქვამი გვამცნობს, რომ „ნეფერტუმი, ლოტოსის ყვავილი, რას ცხვირთანაა, როცა ის აღზევდება ზეცაში ყოველ დილას“. სავარაუდოდ, აქ ნეფერტუმი გვევლინება, როგორც კოსმოგონიური სისტემის მთავარი წევრი, როგორც პირველქმნილი ლოტოსი. ამ წარმოდგენის თანახმად ითვლებოდა, რომ რა ყოველ საღამოს ლოტოსის ყვავილში იდებდა ბინას, და დილით, როცა ყვავილი გაიშლებოდა, მოევლინებოდა სამყაროს განახლებული, ჩვილი ბავშვის სახით.
ლოტოსის სურნელთან კავშირის გამო ნეფერტუმი ასევე პარფიუმერიის და სურნელოვანი ზეთების ღმერთი გახდა, რასაც ეგვიპტეში ძალიან დიდი მნიშვნელობა ენიჭებოდა. ნეფერტუმი გამოისახებოდა ანთროპომორფულად, ხანდახან ლომის თავით ან დამჯდარ ლომზე მდგომი, თავზე ლოტოსის ყვავილით. მისი ატრიბუტი იყო [[ხმალი].
