ლომი (ეგვიპტურ მითოლოგიაში)
ლომი – ლომის კულტი მთელ ეგვიპტეში უძველესი დროიდან იყო გავრცელებული. ამ სახით 65 ღვთაებას ეთაყვანებოდნენ. თუმცა ლომთან ძირითადად ქალღმერთები იყო ასოცირებული (სახმეტი, მატიტი, მეხიტი, მენტიტი, ბასტეტი და სხვ.), იყო დიდი ლომის სახის ღმერთებიც, განსაკუთრებით დელტაში (მისისი). ლომის სახე შეიძლებოდა მიეღო რას, ამონს და ხორს. მკვდართა წიგნში გარდაცვლილი ამბობს: „მე ვარ, ვინც ზეცას გადაკვეთს, მე ვარ რა, მე ვარ ლომი“. ლომის და რას დაახლოება განსაკუთრებით ბერძნულ დროში მოხდა. ამ დროის მაგიურ პაპირუსებში რა თავისი ღამის მგზავრობის მეხუთე და მეექვსე საათებში ლომის სახით არის წარმოდგენილი.
ჰელიოპოლისში შუს და ტეფნუტს ეთაყვანებოდნენ, როგორც „ლომების წყვილს“. ლომის (განსაკუთრებით ძუ ლომის) კულტები მრავლად იყო უდაბნოსაკენ მიმავალი ვადის მიდამოებში, საიდანაც ქარავნების მარშრუტები იწყებოდა და მექარავნეები გრძელი გზის დასაწყისში „უდაბნოს დაბლობების ქალბატონს“ მოილოცავდნენ. სწორედ ასეთი მოსალოცი ადგილები იყო ამონხეტეპ III-ის ტაძარი უდაბნოში ელ ქაბის აღმოსავლეთით, მეშეხი ლეპიდოტონპოლისთან ტინიტურ ნომში, დერ ელ გებრავი ასიუტთან, სპეოს არტემიდოსი ბენი ჰასანის სამხრეთით და სხვ. ლომი დაკავშირებული იყო სამეფო ძალაუფლებასთან და მეფის განსახიერებად ითვლებოდა. ამ წარმოდგენამ შექმნა სფინქსი – ფარაონის პორტრეტი ლომის სახით.
