სეშატი
სეშატი – (ეგვ. „დამწერლობის ქალბატონი“, „ქალი-გადამწერი“), დამწერლობის, ბიბლიოთეკების და თვლის ქალღმერთი. გამოისახებოდა ანთროპომორფულად, თავზე შვიდქიმიანი ვარსკვლავით და მშვილდის მსგავსი ნიშნით, რომლის მნიშვნელობა დაუდგენელია. ეცვა ლეოპარდის ტყავის სამოსი.
II დინასტიით დათარიღებულ გამოსახულებაზე ეხმარება ფარაონ ხასეხემუის სასაზღვრო ჭოკების ჩარჭობაში თოკის გაჭიმვის ცერემონიის დროს, რომელიც ტაძრის ფუნდამენტის ჩაყრის რიტუალის კულმინაციას წარმოადგენდა. ითვლიდა ფარაონის მეფობის წლებს. იყო ნაგებობის გეგმების შემდგენელი და მშენებლობების და მშენებლების ქალბატონი. გადახლართული იყო ჰერმოპოლისის ოგდოადასთან და ახალი სამეფოდან გახდა თოტის მეუღლე ან ქალიშვილი. ჰელიოპოლისში იყო საკრალური იშედ-ხის კულტი, რომელიც ფარაონის სიცოცხლის ხედ ითვლებოდა. სეშატი და თოტი მის ფოთლებზე ფარაონის მეფობის წლებს და სახელს წერდნენ. გაიგივებული იყო ხატხორთან, მაფდეტთან, ნეფტიდასთან. შესაძლოა მისი მეუღლე იყო სეშაუ, რომლის შესახებ პრაქტიკულად არაფერია ცნობილი, გარდა იმისა, რომ გვიანდელ პერიოდში ოსირისის გამოვლინების ერთ-ერთი ფორმა ან ეპითეტი გახდა.
