კეპლერი იოჰანეს
იოჰანეს კეპლერი – (გერმ. Johannes Kepler, (1571-1630 წ.), გერმანელი ასტრონომი და მათემატიკოსი.
იოჰან კეპლერი უპირველესად ასტრონომი იყო და მისი მთავარი დამსახურებაც მეცნიერების ამ სფეროს მიეკუთვნება. იგი არის პლანეტების მოძრაობის სამი არაჩვეულებრივად მნიშვნელოვანი კანონის აღმომჩენი. ეს კანონები განსაზღვრავდნენ პლანეტათა მოძრაობის გზებს და მზიდან მათი დაშორების მიხედვით გარშემოვლის დროს. ეს კანონები შემდგომში გავრცელებულ იქნა კოსმოსურ სივრცეში არსებულ ყველა ციურ სხეულზე. კეპლერის დამსახურებები ფიზიკის სფეროში არცთუ საკმაოდ დიდია, თუმცა მათი მოხსენიება საჭიროა. როგორც ფიზიკოსი იგი ოპტიკაში მოღვაწეობდა და აქ ახალი სიტყვაც თქვა. ოპტიკის პრობლემებს იხილავდა გეომეტრიული გზით. გეომეტრიის საფუძველზე გამოიკვლია სინათლის სხივების სწორხაზოვნება, აგრეთვე სინათლის არეკვლისა და გარდატეხის მოვლენები. შეისწავლა სხივების შესვლა ჭოგრში და მის გაუმჯობესებაზე მუშაობდა.
ამ გამოკვლევების შედეგი იყო ორი მეცნიერული ტრაქტატი ოპტიკაში. განმარტა მოვლენა რომელიც კამერა-ობსკურაში ხდებოდა. აღმოაჩინა გამოთვალა და მოგვცა სინათლის შემცირების კანონი. ამ კანონის მიხედვით სინათლის ინტენსივობა უკუპროპორციულია სინათლის წყაროდან გასანათებელ ზედაპირამდე მანძილის კვადრატისა.
იოჰან კეპლერი დაიბადა 1571 წ. 27 დეკემბერს. 16 წლის შევიდა უნივერსიტეტში. სწავლის წლებში გაეცნო კოპერნიკის თეორიას. მაგისტრის წოდების მიღების შემდეგ დაინიშნა გრაცში მათემატიკისა და ასტრონომიის პროფესორად, საიდანაც გაემგზავრა პრაღაში და მუშაობა დაიწყო რიხო ბრაგეს ობსერვატორიაში. 1612 წელს კათოლიკების მიერ კალვინისტების დევნისა და კოპერნიკის შეხედულებების გავრცელების გამო იძულებული იყო დაეტოვებინა ეს ქალაქი. პრაღიდან გადავიდა ქალაქ ლინცში. მან იქ შეადგინა ასტრონომიული ცხრილები. ეს მეცნიერი მთელი თავისი სიცოცხლე ებრძოდა გაჭირვებას, დევნითა და სიღარიბით დაუძლურებული ავად გახდა და გარდაიცვალა 1630 წლის 5 ნოემბერს.
