საბაზრო ინფრასტრუქტურა
საბაზრო ინფრასტრუქტურა - (market infrastructure), სახელმწიფო და კომერციული საწარმოების, დაწესებულებებისა და ორგანიზაციების ერთობლიობა, რომელიც უზრუნველყოფს საქონლის, მომსახურების, კაპიტალის, სამუშაო ძალისა და ა.შ. ბაზრების ნორმალურ ფუნქციონირებას.
ამ ბაზრების მომსახურების ფორმები სხვადასხვაგვარია. საქონლის ბაზრის ინფრასტრუქტურაში შედის საბითუმო და საცალო ვაჭრობის მთელი ქსელი - მაღაზიები, უნივერმაღები, უნივერსამები და ა.შ., აგრეთვე, აუქციონები, ბაზრობები, კომერციული საშუამავლო ცენტრები და საქონლის ბირჟები, სპეციალური სახელმწიფო ორგანოები: ანტიმონოპოლიური კომიტეტი, ფასების კონტროლის ინსპექცია, საკონტრაქტო სისტემის დაწესებულებები და სხვ.
საგარეო ვაჭრობას აქვს თავისი ინფრასტრუქტურა, რომელშიც შედის კომერციული ცენტრები, სავაჭრო-სამრეწველო პალატები, საგამოფენო პავილიონები, სავაჭრო სახლები და ა.შ.
კაპიტალის ბაზრის ინფრასტრუქტურა მოიცავს მთელ საბანკო სისტემას, მათ შორის, კომერციულ ბანკებს, საფონდო ბირჟებს, ვალუტის ბირჟებს, საბროკერო და სადაზღვევო კომპანიებს, ჰოლდინგებს და ა.შ. მასში შედის აგრეთვე სააუდიტორო ფირმები, რომლებიც კომერციულ საწყისებზე ახორციელებენ სხვადასხვა საფინანსო-საკრედიტო მომსახურებას, რიგი სახელმწიფო ორგანოებისა: ფასიან ქაღალდებზე კონტროლის ინსპექცია, სახელმწიფო ქონების ფონდი და სხვ.
შრომის ბაზარი ასევე მოითხოვს შესაბამის ინფრასტრუქტურას, რომელშიც შედის შრომის ბირჟები, სამუშაო ძალაზე მოთხოვნა-მიწოდების შესწავლის, კადრების გადამზადების, მიგრაციის რეგულირებისა და სხვა სახელმწიფო სისტემები.
საბაზრო ინფრასტრუქტურის ზოგიერთი რგოლის დანიშნულებაა არა ცალკეული ბაზრების, არამედ მთელი საბაზრო მეურნეობის მომსახურება. ესაა: გამყიდველთა და მყიდველთა იურიდიული მომსახურება, სატრანსპორტო სასაწყობო სისტემა, საინფორმაციო და სარეკლამო მომსახურება და ა.შ.
