სათისი
სათისი – (ეგვ. Śtj.t), ანთროპომორფული სახის ქალღმერთი. გამოისახებოდა ქვემო ეგვიპტის მაღალი თეთრი გვირგვინით, რომელზეც ანტილოპას რქები იყო მიმაგრებული.
მისი სამშობლო კუნძული სეხელია, მაგრამ უკვე ძველი სამეფოს დროს მისი კულტი გავრცელდა ელეფანტინაზე და შუა სამეფოდან „ელეფანტინას ქალბატონი“ და ხნუმის მეუღლე ხდება. ელეფანტინას ტაძარში ეთაყვანებოდნენ ასევე ტრიადას, რომელიც ხნუმის, სათისის და ანუკეტისაგან შედგებოდა. ანუკეტთან გადახლართვის გამო ხდება „საზღვრების დამცველი“ და „ნუბიის ქალბატონი“. მისი თეთრი სამეფო გვირგვინი შესაძლოა დაკავშირებულია პირამიდების ტექსტების გამონათქვამთან, სადაც სათისი „ორივე მიწის“ მფლობელად არის გამოცხადებული, რაც ალბათ მის უძველეს პოლიტიკურ მნიშვნელობაზე მიუთითებს. ახალი სამეფოდან ასოცირდებოდა „რას თვალთან“, ანადგურებდა მეფის მტრებს თავისი ისრებით. მაგრამ ამ რეგიონის ქალღმერთების მსგავსად, სათისი ძირითადად არის „ის, ვინც გრილ წყლებს გაიღებს“. უკვე პირამიდების ტექსტებში სათისს ჭურჭლით მოაქვს ელეფანტინადან გამაგრილებელი სითხე გარდაცვლილი ფარაონის განსაწმენდად.
