კავთისხევის წმინდა გიორგის ეკლესია
კავთისხევის წმინდა გიორგის ეკლესია - ეკლესია მდებარეობს, საქართველოში,შიდა ქართლის მხარეში, კასპის მუნიციპალიტეტში, სოფელ კავთისხევის თხინვალიაანთ უბანში. სამხრეთ კარის ტიმპანზე ამოკვეთილი მხედრული წარწერის მიხედვით ეკლესია 1886 წელს აუგია ოსტატ ჯაბადარს.
აღწეილობა
ეკლესია დარბაზულია (20,85 X 8,55 მ), ნაგებია ნატეხი და რიყის ქვით. კონსტრუქციის ნაწილები და ლავგარდანი აგურისაა. ეკლესიას შესასვლელი სამი მხრიდან ჰქონია. მთავარი შესასვლელი სამხრეთიდანაა, დანარჩენი ორი ამოქოლილია. ისინი ფრონტონით ყოფილა გადახურული. ნახევარწრიულ აფსიდში სამი სარკმელია. დარბაზი გადახურულია ნახევარწრიული კამარით, რომელიც ერთსაფეხურიან პილასტრებზე ამოყვანილ ორ საბჯენ თაღს ეყრდნობა. გრძივ კედლებში ოთხ-ოთხი ფართო სარკმელია. ინტერიერის დასავლეთ ნაწილში სამმალიანი თაღებით გახსნილი პატრონიკეა. იგი ფართო გასასვლელით უკავშირდება სამნაწილიან მინაშენს, რომლის შუა ნაწილი კარიბჭე ყოფილა (ამჟამად ამოშენებულია). ეკლესია მაღალ ცოკოლზე დგას. აღმოსავლეთ ფასადზე საკურთხევლის ნახევარწრიული შვერილია. დასავლეთ, ჩრდილოეთ და სამხრეთ ფასადებზე, ცენტრალურ არეებში აგურის წყობით გამოყვანილია დეკორატიული ჯვრები. დასავლეთ ფასადის ფრონტონის კუთხეზე ნახევარწრიული თაღებით გახსნილი ოთხბოძიანი სამრეკლო დგას.
