კონტრდარტყმის მოგერიება
კონტრდარტყმის მოგერიება - შემტევი ჯარების საბრძოლო მოქმედებები, რომლებიც წარმოებს მოწინააღმდეგის კონტრდამრტყმელი (კონტრმოიერიშე) დაჯგუფებების გასანადგურებლად და შემტევი ჯარების ოპერატიული დაწყობის (საბრძოლო წყობის) სიღრმეში მათი შემოჭრის აღსაკვეთად და შეტევის გაგრძელებისთვის პირობების შესაქმნელად.
II მსოფლიო ომში კონტრდარტყმის მოგერიება მეტწილად ხორციელდებოდა გაერთიანების (შენაერთის, ნაწილის) ძალთა ნაწილის ან მთელი ძალების თავდაცვაზე გადასვლით, ცალკეულ შემთხვევებში - მოწინააღმდეგის კონტრდამრტყმელი (კონტრმოიერიშე) დაჯგუფების წინააღმდეგ აქტიური შეტევითი მოქმედებებით.
ომის შემდგომ პერიოდში სამხედრო ხელოვნების თეორიით გათვალისწინებულია კონტრდარტყმის მოგერიება. და მოწინააღმდეგის კონტრდამრტყმელი (კონტრმოიერიშე) დაჯგუფებების განადგურება.
კონტრდარტყმის მოგერიება შეიძლება განხორციელდეს მათი საცეცხლე (ბირთვული) დაზიანებით, მათ შორის, მაღალი სიზუსტის იარაღით, დისტანციური დანაღმვის და რადიოელექტრონული ბრძოლის საშუალებების მასირებული გამოყენებით თავმოყრის რაიონში. ასევე წინ წაწევის მარშრუტებზე და გაშლის ზღუდეებზე, მათი თავდაცვითი ძალისხმევის ჩახშობით და შეტევითი მოქმედებებით საბოლოო განადგურება. ამასთან, განსაკუთრებით მოწინააღმდეგის მანევრის და გაშლის ჩასაშლელად გათვალისწინებულია საჰაერო დესანტების (სადესანტო-მოიერიშე ჯარები), მეწინავე რაზმების ფართოდ გამოყენება და მოწინააღმდეგეზე შემხვედრი დარტყმების მიყენება. შექმნილი ვითარების, განსაკუთრებით მოწინააღმდეგის კონტრდამრტყმელი დაჯგუფების შემადგენლობის მიხედვით, კონტრდარტყმის მოგერიება შეიძლება ხორციელდებოდეს მთელი შემტევი ძალებით ან ძალების ნაწილით, I, II ეშელონების შენაერთების (ნაწილების, ქვედანაყოფების), ყველა სახეობის რეზერვის, ძალისა და საშუალების მოზიდვით, რომლებსაც გადმოაჯგუფებენ სხვა მიმართულებებიდან. ამასთან, შეიძლება გამოყენებულ იქნეს კონტრდარტყმის (კონტრიერიშის) სხვადასხვა ხერხები. ერთი მათგანია მოწინააღმდეგის კონტრდამრტყმელი (კონტრმოიერიშე) დაჯგუფების საცეცხლე (ბირთვული) დაზიანება ბატალიაში (ბრძოლაში) მის შეყვანამდე ან შეტევაზე გადასვლით. მეორე ხერხი შეიძლება იყოს მოწინააღმდეგის შემუსვრა დარტყმებით შემხვედრი ბატალიის (ბრძოლების) მოწყობის გზით. ასეთი ხერხი, მაგალითად, გათვალისწინებულია აშშ-ის არმიის წესდებით. მოწინააღმდეგის უპირატესი ძალების: კონტრდარტყმისას ჯარებს შეუძლიათ წინასწარ ან იძულებით გადავიდნენ თავდაცვაზე და განახორციელონ თავდაცვითი ოპერაცია (თავდაცვითი ბრძოლა). შესაძლებელია ხერხი, როდესაც შემტევი ჯარების (ძალების) ნაწილი დროებით გადადის თავდაცვაზე (თავისი დაწყობის სერიოზული ცვლილებების გარეშე) და ბოჭავს მოწინააღმდეგის კონტრდამრტყმელ (კონტრმოიერიშე) დაჯგუფებას, ხოლო მთავარი ძალები იმავდროულად ან შემდეგ აყენებენ დარტყმას მოწინააღმდეგეს ფლანგზე და ზურგში, ან ორივე ფლანგზე მოკვეთის და საბოლოო განადგურების მიზნით.
შესაძლებელია კონტრდარტყმის მოგერიების ისეთი ხერხიც, როდესაც შემტევი ძალების ნაწილი ბოჭავს მოწინააღმდეგის დაჯგუფებას, ხოლო მთავარი ძალები გადაჭრით ავითარებენ შეტევას მისი თავდაცვის სიღრმეში; ამით აიძულებენ მოწინააღმდეგეს, ხელი აიღოს კონტრდარტყმის (კონტრშეტევის) განხორციელებაზე. მოწინააღმდეგის მიერ კონტრდარტყმის (კონტრიერიშის) რამდენიმე მიმართულებიდან განხორციელებისას ძირითადი ძალისხმევა თავმოყრილია მისი მთავარი, ყველაზე საშიში დაჯგუფების მოგერიებაზე.
